French Open 2024 khelh mekah champion tura rinkai zinga mi Jannik Sinner chuan tha takin bul a tan a, awlsam takin first round a paltlang. Mipa lama player langsar Carlos Alacaraz a chak laiin Jack Draper leh Andy Murray te an tla nghal thung.
Australian Open champion Jannik Sinner hian thawhlehni khan Christopher Eubanks a hmachhawn. French Open tan a nih hmangin hliamin a tibuai a, inelna hrang hrang hmachhawn thei lo bawk mah se Rolland Garros-ah dam tha takin a inlan a, Eubanks lakah harsatna a tawk lo. Italian World No. 2 Sinners hian Eubanks lakah 6-3 ve ve in set hmasa pahnih a la a. Set thumnaah game li lai hloh bawk mah se break a neih a chhawr tangkai a, set a la zui leh tho thung. A khingpui lakah hian harsatna lian a tawk lova, 6-3, 6-3, 6-4 a hnehna changin second round a lut.
Sinner hian second round ah tualchhung tlangval Richard Gasquet a hmachhawn zui leh ang. Sinner hmaa ding tur Gasquet hian inkhel hmuhnawm takah a khingpui Borna Coric chu 7-6, 7-6, 6-4 in a hneh. Sinner hian kum 2020 khan quarter-final a lo lut tawh a, hei hi French Open-a a chet that ber tum a ni. Inelna neih mekah hian a chet that a, champion Novak Djokovic-a’n semi-final a thleng zo lo a nih bawk chuan Sinner hi World No. 1 thar a ni ang.
Mipa lama player langsar zinga mi, Grand Slam-ah vawi hnih champion tawh Carlos Alcaraz chu Pathianni khan a inlan a, awlsam takin a chak. Alcaraz hian vanneihthlak taka French Open khel phak hram J.J. Wolf a hmachhawn a, set thum an khelh chhungin game li chiah a hloh a, 6-1, 6-2, 6-1 a hnehna changin second round a lut. Champion tura rinkai ber zinga mi Alcaraz hian second-ah harsa taka Jack Draper hnehtu Jesper De Jong a hmachhawn zui leh dawn.
J. De Jong hian Britian player langsar Jack Draper hi 7-5 6-4 6-7 (3-7) 3-6 6-3 in a hneh. Draper a tlak rual hian World No. 1 hlui Andy Murray pawhin first round a paltlang zo lo ve bawk a. Murray hi a khingpui Stan Wawrinka lakah set la lovin a tlawm a, tun hi French Open a hmachhawn hnuhnung ber a ni zui tawh mai thei.