Tun hnaia Mizoram leh Assam ramri hnaiha Assam sorkarin commando camp an sak chungchangah Assam chief Minister Himanta Biswa Sarma-a’n Assam nek anga Mizoram a puh chu thu awmze nei lo a nih thu, Mizoram Home Secretary H Lalengmawia’n a sawi.
He thu hi Thawhtannia amah kawmtu chanchinbumi thenkhatte hmaah sawiin Home Secretary H Lalengmawia chuan, Assam leh Mizoram ramri chinfel a nih hma hauh a, state pahnihte’n a tawn tawna encroachment tih thumal hman a rem lo tih a sawi a, “A chhan chu, Assam leh Mizoram ramri hi chingfel a la ni lo a. Ramri chingfel turin vawi duai lo state pahnihte’n inbiakna neih a ni tawh a. Ramri chungchanga inbiakna nei leh tura thu kal lai a awm mek laia, tun hnai kum 2/3 chhung pawhin vawi nga aia tlem lo state pahnih aiawhte kan lo inbe tawh a. Lehkha pawh vawi duai lo kan inthawn tawn nghe nghe a. Kumin February khan state pahnih chief minister-te chu inhmuin, ramri chingfel turin theihtawp an chhuah dun an remtih thute an sawi dun a ni,” tiin, Assam chief minister-in encroachment tih thumal a hmang chu hun lo an tih bakah, pumpelh tha an tih thu a sawi.
H Lalengmawia chuan, Assam lamin Hailakandi district chhung, Damcherra-a commando camp an sa ngei a ni tih an hriat thu a sawi a. Amaherawh chu, Commando camp sak hna bul an tan lai hian Forest Concervation Amendment Act, 2023 in a sawi angin Forest clearance an la lo nia an hriat thu a sawi a. PCCF MK Yadava chuan camp sak phalna a pe ringawt nia a lan thu a sawi a. Forest clearance act dan kalh a phalna la lo a commando camp sak nia hriat a nih avangin Regional Office, Ministry of Environment & Climate Change, Shillong chuan MK Yadava hnenah show cause notice pek niin, camp sak hna pawh tihtawp tir nghal nia ni mah se, hemi chungchangah Assam CM hian Union Minister hnenah forest clearance pe tura inrawlh turin a ngen nia an hriat thu a sawi.
Home Secretary hian, Assam ram chhungah tho, Nagaland depah kum 2022 khan Geleki Reserve Forest huam chhungah Assam sorkarin cammando camp tho hi an sa tawh a, an hriat danin Forest Conservation Act hnuaiah phalna an lak loh avangin, Forest Ministry in an hmalakna te a tihtawp tir tawh nia an hriat thu a sawi bawk.
Ngun taka an zirchian hnuin he thil hi forest clearance chungchang a ni tih a chian thu sawiin H Lalengmawia chuan, “He forest clearance hi Assam sorkar leh Forest Ministry thil a ni a. Mi chhungkaw buaina thil, Assam leh Forest Ministry chungchangah sawi theih kan nei lo a. Assam sorkarin commando camp an sak tur chungchangah sawi theih kan nei lo a; amaherawh chu, Assam CM-in Assam nek anga Mizoram a puhna chu thu awmze nei lo a ni,” a ti.