- Ruata
Tata chuan an premium hatchback lar leh hralh kal, Altroz chu 2024 model lineup-ah variant thar pathum – XZ Lux, XZ+ S Lux leh XZ+ S Lux Dark phochhuah a ni.
A man tur hi company lamin an la puangzar lo a. He Altroz update tharah hian infotainment screen lian zawk, 10.25-inch touchscreen infotainment system kan hmu dawn a. Hei hi an SUV lian ho, Harrier leh Safari-ah te kan hmu mek a ni.
He infotainment system lian zawk hi XZ Lux variant leh a chunglamah te kan hmu dawn a. XZ Lux leh a hnuailamah chuan a hmaa kan hmuh thin 7-inch infotainment unit a la hmang thung dawn a ni.
Hei bakah hian XZ Lux hian 360-degree camera with blind view monitor a rawn nei thar dawn a. A variant sang ber XZ+ S Lux variant-ah phei chuan 7-inch TFT instrument cluster bakah airbag paruk an dah thar bawk a ni.
Thil thar pakhat chu heng Altroz update tharah hian leatherette seat an rawn dah tawh lo thung a. Tun thla ni 7-a tlangzarh tur Tata Altroz Racer-ah leatherette seat hi chu kan la hmuh hmel thung a ni.
A khawl lamah chuan heng Altroz variant thar ho hian khawl ngai, a hmaa chhuak pawhin a hman thin – 88bhp, 1.2L naturally aspirated petrol engine, 90bhp, 1.5L diesel engine, leh 74bhp, 1.2L petrol CNG fuel duhthlan tur te a la nei zel dawn a ni. 1.2L turbo petrol engine, 120bhp leh 170Nm torque pechhuak thei tura khawih danglam (tune) chu Tata Altroz Racer rawn chhuak turah kan hmu thung dawn a ni.
- Tata hmachhawp dang
Tata Motors hian an Electric Vehicle product portfolio lamah huang zauh an tum mek a, EV model thar hrang hrang kan hmu chho dawn a ni. Heng zingah hian Curvv EV, Harrier EV, Safari EV, Altroz EV, leh Tata Sierra EV te chu lo chhuak tura beisei te zinga mi an ni.
Tata Curvv EV hi kumin kumtawp lamah an tihchhuah beisei a ni a. He electric SUV chhuak thar tur, Tata Gen 2 Acti.ev platform nghahchhana duan hian vawikhat charge full in km 500 lai a tlan thei dawn a. Tata Motors hian ICE-powered version Curvv (petrol leh diesel khawl pangngai hmang) chu kum 2025 kum chawhma lamah an tihchhuah a beiseiawm bawk a ni.