Karnataka-a zirna in chhunga hmeichhiaten lu an tuam phal lohna duh lotute lu tuam ngaithei lote inkara buaina awm zelah state sorkar chuan ni thum chhung high school leh college khar vek rih turin a ti.
Chief Minister Basavaraj S Bommai chuan high school leh college chu ‘muanna a awma boruak a daih nan’ khar turin thupek a chhuah tih Twitter-ah a tar lang.
Udupi district-a sorkar college-a kal hmeichhe zirlai pangaten zirna ina lu tuam khap chungchanga Karnataka High Court-a petition an thehlut pawh Thawhlehni khan ngaihtuah tan a ni.
High court hian Nilaini pawh hian a ngaihtuah chhunzawm dawn a. Zirlai leh mipuite chu boruak tichhe zawnga awm lo turin court hian a ngen a. “He court hian finnaah rinna nghat pumhlumin vantlang thatna pawh a ngaihtuah ber a ni a, chutiang chiah chuan rorelnaah pawh kenkawh a ni,” tiin Justice Dixit Krishna Shripad chuan a sawi.
Court-in petition a ngaihtuah mek lai hian chief minister chuan Twitter-ah, “Zirlai, zirtirtu, sikul leh college enkawltute leh Karnataka mipuite chu muanna vawng nung turin ka ngen a. High school leh college zawng zawng ni thum khar turin thu ka pe a, a kaihhnawih zawng zawngten zawm turin ka ngen a ni,” a ti.
College-ah hian zirlaite chu lu tuam phal ni mah se class chhungah erawh an tuam phalsak an ni lo niin thuneitute chuan an sawi.
Karnataka Home Minister Araga Jnanendra chuan zirlaite chu zirna inah lu tuam emaw, nghawngbah emaw pawh bat lo turin a ti.
Thla hmasaa Government Girls PU College, Udupi-a zirlai parukte an lu an tuam avanga zirna in chhunga luh phalsak loh duh lohna an lantir atangin Karnataka-a zirna ina lu tuam leh tuam loh buaina hi a intan a. Udupi leh Chikkamagaluru-a Hindu kulmukte chuan Muslim hmeichhiaten zirna ina lu an tuam hi an dodal ve zui.
Zirtawpni leh Inrinni khan zirlai rual, lu tuam duh lo pawlte chuan an duh lo tih lantir nan chuan serthlum rawng nghawngbah batin college an kai.
Thawhlehniah khan heng duh dan inang lo zirlaite hi lunga intawngin lu tuam duh lotute chuan serthlum rawng puanzar chu college-ah an zar.
Mandya-a college pakhatah chuan Muslim zirlai chu serthlum rawng nghawngbah bat mipaten din hualin ‘Jai Shri Ram’ tiin an au khum a. ‘Allah hu Akbar!’ tiin a au let ve.