Zu rui chunga lirthei khalh vanga man Justin Timberlake chuan amah mantu officer hnenah, ‘Tour a neih turin a tuar dawn’ tih a hrilh.
Police officer hi la naupang lam niin, zaithiam lar tak hming leh hmel a hre lo. Inhmachhawnna ah, “Tour-in a tuar dawn’ a tih sap lai chuan officer hian, ‘Eng tour maw?’ tiin a zawt a, ‘World tour’ tiin a chhâng.
Justin hian breathanalyser test a nei duh lo bawk a, stop sign-ah pawh a tlan tlang lui a, lane lo ah a tlan nia hriat a ni.
Pop star hi Suffolk County District Attorney office-ah thubuai siamsak niin, milar tak takte’n nipui chawlh an hmanna thin Sag Harbor, Hamptons-ah man a ni a, chanchin buatsaih lai hian bail-a chhuah lailawk a ni.
Grammy vawi 10 lai dawng tawh Justin Timberlake hi rimawi khawvel ah mai ni lo, lemchan khawvelah te pawh hming a chher a, ‘The Social Network’ leh ‘Friends With Benefits’ film-ah hneh taka inlanin, a lar vet vet hle.
Hollywood actress Jessica Biel nen inneiin, fa pahnih an nei.