Lai Autonomous District Council a MDC pakua-te chu Tuichâng bialtu MLA W.Chhuanawma, Vice President, ZPM General Headquarters, Govt.Deputy Chief Whip ni bawk chuan nimin khan ZPM-ah a lawm lut.
Lawmluhte hi MNF atangin MDC pasarih: Mânghmûnga Chinzah, B.N Thangpuia, CL Lianzuala, V.Zathanga, T.Lalêngmuana, Tuturu Singh, L.Lalhmachhuâna-te leh Independent MDC N.Zangûra leh L.R Dingliana Chînzah-te an ni.
Lawmluhna inkhâwm LADC Hall, Lawngtlaia neihah W.Chhuanawma chuan, “Ram leh hnam hmasâwnna tura ke pên a, ei rukna ti rèm a, mipuite tana ke pên pui atân ZPM policy-ah kan lawm lût che u a ni”, tiin MDC-te a lawm lût a, “State-ah ZPM a sawrkâr hlim leh LADC sawrkârah sawrkârna siam thei an awm loh lai khan ZPM-in kan duh chuan sawrkârna kan siam thei a, mahse state sawrkar hmasate’n an thuneihna hmang suala District Council sawrkâr an pawngsual ṭhin chu tihtawp kan duh a, kan thuneihna kan hmang sual ve duh lo a ni”, a ti.
W.Chhuanawma chuan LADC hnuaia Chandmary bial MDC bye election leh Village Council inthlan lo awm turah ZPM candidate-te vote tura mipuite sâwmin, “ZPM chuan Autonomous District Council sawrkâr inrêlbawlna hi zahawm kan ti a, MDC bye election leh VC election-ah ZPM party lo thlang tling ula ngel nghet leh zahawm takin LADC rorêlna kan siam ang a, kan tibeidawng lo ang che u, ZPM hi sawrkar hma leh sawrkar hnua thusawi danglam ve ngai lo kan ni; Pathianin rem a tih chuan ZPM hlang sawrkarna pawh LADC-ah hian kan siam thei a ni,” a ti.
Dr. Lorraine Lalpêkliana Chinzah, Lawngtlai East bialtu MLA, Adviser to CM pawhin thu sawiin, “ZPM policy a hlawhtlin theihna tura hma la tur leh mahni indah ṭha a, ram leh hnam tâna ke pen pui atân ka sawm che u a ni. ZPM-in a ngaih pawimawhber chu eirûkna do a ni a, lungphûm pathum:- dikna, rinawmna leh huaisenna chu ZPM party chuan a kalpui mêk a, inlungrual takin i awm zel ang u”, tiin MDC lawmluhte leh mipuite a chah a, anni bakah hian hian R.Lalchawia, PAC Member, ZPM General Headquarters leh H.Vanlalhlua, General Secretary i/c ADC, ZPM General Headquarters te pawhin lawmthu sawina leh fuihna thuchah an sawi bawk.
Lawmluh inkhawm hi H.Lungrualkima, Treasurer, ZPM Lai District Headquarters-in a kai hruai a, Rev.F.Lalbiakthuama, District Superintendent, UPC NEI-in hun serh hmangin, M.C Lalramchhana, President, ZPM Lai District Headquarters chuan inlawmna thuchah tawi a sawi a, K.Hre Kung, MDC, Adviser, ZPM Lai District Headquarters leh lawmluhte atangin Manghmunga Chinzah, MDC (Ex-CEM) bakah N.Zangura, MDC-te leh hruaitu dangte’n thu an sawi a, J.Zahlira, Vice President, ZPM Lai District Headquarters chuan lawmthu sawina hun tawp a hmang bawk a ni.