Prof. Lalnilawma Minister PHE, etc. khaw chhuahna South Khawbungah amah lawmna leh chawimawina hun nimin khan khawtlang huapa hman a ni a, he huna a thusawinaah Nitea chuan, “Party sawi lova ram leh khawtlang hmasawnna tur ngaihtuah hi kan ram damna tur a ni,” a ti.
Prof. Lalnilawma chuan,”Pu Lalduhoma kaihhruai ZPM Ministry chuan kan ram siam tha turin theih tawp kan chhuah mek a, kan rawngbawlsak mipuite pawhin Sorkar hmalakna leh ruahmannate a hlawhtlin theih nan theihtawp min chhuahpui turin kan ngen a ni,”a ti. “Khawtlang hruaitute zingah Party awmna in an loh vanga, ram leh khawtlang hmasawnna tura sorkar ruahmanna leh hmalaknate a tikhaihlaktu leh ti thuanawptu awm lo se kan duh hle a, ram hmangaihna thinlung pu chunga kan ram hmasawn nana thawhho hi a tul hle a ni,” a ti.
Nitea chuan,”Ram hmasawnna tura ministry-in hmalakna a neih mekah Sorkar Officials ten theih tawpa sorkar hmalakna a hlawhtlin theihna tura ngaihtuahna an seng thin hi lawmawm ka ti a, kan ram siamtha a, hmasawnna chhenfakawm kan neih theih nan sorkar hnathawkte hi an pawimawh hle a ni,” a ti bawk.
He hun hi Lalchhanhima Hnamte YMA President in kaihruaiin Rev.Lalnuntluanga’n hunserh a hmanga, Mal zai leh Cheraw bakah MHIP ten Par lam an entir bawk.