Nimin khan Lalmuanpuia Punte MLA, Adviser to CM (Political) chuan Phuldungsei, Zampui a tlawh a. Lalnuntlingi VCP Inah khawtlang hruaitute nen inkawm hona neiin, tunhnaia Phuldungsei khuaa mi ṭhenkhat ration card aṭanga paih an nih chungchang a sawifiah.
Lalmuanpuia Punte chuan, “India ram pumah One nation one ration card kalpui mek a ni a. Mizoram leh Tripura-a awm kawp in lo awm avangin khawl (system) aṭangin harsatna a lo awm a. Mizoram lamah awm vek turin kan duh che u a, Mizoram mi in nih avangin Tripura lama ration card nei tawh lova Mizoram lama nei vek turin kan duh che u a ni. India ram hmun dangah pawh thliar fel hna hi thawh mek zel a ni a, Phuldungsei chauh ni lo, Mizoram hmundanga mite pawh hmun khat aia tama awm kawpte pawh thliar fel a ni. Chuti chungin Tripura leh Mizorama neih kawp ṭalh in duh a nih pawhin kawng danga in neih theih dan tur (manual ration card) ngaihtuah pawh Mizoram sorkar chuan a inhuam a ni. Mizoram sorkar hi in nu leh pate kan ni a, nu leh pain fate an kalsan ngai lo, eng kawngah mah kan kalsan ngai lovang che u,” a ti.
Muanpuia chuan, “National Food Security Act-in ration card hi identity prove-na atana hman tur a ni lova, State danga hnathawka kal khal ṭhin (migrant workers) te pawh an inhlawhna state-ah pek theih an ni a, an khaw lamah erawh chuan paih hrih a ni ang a, an duh hunah dah let leh tur a ni ang. Chutiang chu a kalphung a ni,” a ti bawk.
Adviser to CM hian IR Post Zomuantlang tlawhin an harsatna te a ngaihthlak sak a. Thuneitu sang zawk te hnena thlen a tum thu a sawi bawk a ni.