Inrinni zana English Premier League 2024/25 khelh chhunzawm a ni a, inkhel hmasa berah Manchester United chu Brighton hneh lovin an tlawm. EPL manager naupang ber Fabian Hurzeler hnuaiah Brighton an khel tha chhunzawm zel a, season tharah an la chak vek.
EPL a club hlawhtling ber Manchester United hi Brighton & Hove Albion hmachhawn turin American Express Stadium-ah an leng lut a, Brighton lakah an khelchhia tia sawi tur a ni lo chungin tlawm zawkah an tang. Player chherchhuak tha thei tak Brighton hian an mikhual United lakah an khel tha viau a, an vannei tel bawk. Hun tawp dawn hnaih lama Alejandro Garnacho goal thun hnawl a ni hlauh a, hei hi an chak theih chhan pawimawh tak a ni.
An mualah point hlawhchhuah ngei tuma tan khawh Brighton tan hian forward tawnhriat nghah Danny Welbeck chuan minute 32-naah Kaoru Mitoma siamsak tha tak chu hnaite atangin a pet goal a, hmahruaina goal a thun. Team lian lakah goal thun hmasa zawka an tan vangin an phur a, inrintawkna sang zawk nen an mualah an inlanchhunzawm theih phah.
Si an phurh hnuin United hian na takin an khingpuite an nawr let zui nghal a, goal pawh an thun thuai, Marcus Rashford chuan an si phurh sutna goal thun zet mah se offside vangin he goal hi hnawl a ni. Hemi hnu lawk hian hlauhawm takin an nawr zui leh a, Brighton si nghak Jason Steele an paltlang thei lo thung. Chawlhlawk hmain an si phurh an sut thei lova, hnufual zawk ni chungin chawlhlawk an hmang.
Chawlhlawk hnu lamah Brighton an khel tha chhunzawm a, goal an thun belh teuh thei hle. Second half tir lamah tha zetin an nawr tlang a, si nghak Andre Onana an pet kan hman zet a, goal line bul atangin Martinez chuan a lo petchhuak hman hlauh a, United an him hram. Hemi hnu lawk hian Brighton in goal bar an tauh per leh dawp a, United an him nawn leh. Derthawng zawk an nih reng hnuin United in hun tha an hmu a, an si phurh an sut ta nge nge. Fuh taka a khalh tlang hnuin Amad chuan minute 60-naah goal thunin an si phurh a sut.
Amad goal thun hian United a fuih phur viau a, na zawkin an khingpuite an nawr chhunzawm. Fuh taka an khingpuite an nawr tlang hnuin bench atanga lut Alejandro Garnacho chuan hma an hruai letna goal a thun. He goal hi VAR hmanga en nawn a nih hnuin United player thar Joshua Zirkzee chuan offside position-a awm chungin ball a lo tawk zauh a, United hmahruaina goal hi hnawl a nih phah. Zirkzee hian Garnacho ball pet hi lo dek tawh miah lo pawh nise a goal dawn tho niin a lang a, a khupa a lo tawh zeuh vangin a goal chiang leh zual naa hnawl a nih phah ta thung. Vanduaithlak taka an goal hnawl a nih hnuin an tlawm zui ta bawk si a, United tan pawi zawng zawnga pawi ber a tling ta hial awm e!
United hmahruai letna goal hnawl a nih hian Brighton a fuih phur ve thung a, hun tawp dawn hnaihah na takin an mikhualte an nawr. Hun pek belh minute 90+5-ah corner an hmuh an chhawr tangkai a, hnaite atangin vengtu nei lo João Pedro chuan chiang zetin a tauh goal a, Brighton chakna goal a thun. Pedro goal thun hnu hian goal dang a luh belh tawh lova, Brighton chuan United lakah point thum hlu tak an hmu zui ta a ni.
Brighton manager Fabian Hurzeler hi kum 31 chauha upa a ni a, khawvela tualchhung league lian leh harsa bera ngaih English Premier League-ah manager naupang ber a ni. EPL a manager naupang ber Hurzeler hnuaiah Brighton in bul an tan tha viau a, season tharah vawi hnih khel tawhin an la chak ve ve. Vawi hnih an chak zawn a ni satliah lo va, an khelh hnihnaah an hnehte hi EPL-a club ropui ber Manchester United an ni.