August 27, Thawhleh ni khan RG Stadium, Mualpuiah LZ Juice MPL 11 Round 7 khelh chhunzawm a ni a, Aizawl FC chuan awlsam taka SYS FC hnehin hmahruaitu Chanmari FC nen an inkar an tizim. Thawhlehnia inkhel dangah Siphir Venghlun FC chuan Chawnpui FC hnehin point thum an hmu ve bawk.
- AFC in Chanmanri an um
MPL 11-ah champion hlui Aizawl FC an khel tha a, tlawm nei lovin an kal tluang chhunzawm zel. An mahni ang thova tlawm nei lo Chanmari FC hnuaiah AFC hi an awm a. Thawhtanniah Chanmari FC in awlsam taka hnehna an chan vangin an inkarah point nga a tla zep hman. Hmahruaitu CFC nen an inkar zau hman mah se 3-0 ngawta SYS FC sawpin Chanmari FC nen an inkar an tizim nawn leh a, an inkarah point hnih bawk a tla zep nawn leh.
Chanmari FC nen an inkar tizim tura chak mamawh Aizawl FC hian rawlthar team hmuhnawm SYS FC lakah bul an tan tha viau a, minute 19 chhungin goal hnih ngawt an thun hman. Inkhel tan atanga minute hnihna lekah C Lalhriatpuia chuan AFC hmahruaina goal a thun. Kuriz man of the match a thlan zui tak C Lalhriatpuia hian minute 19-naah an goal hnihna a thun a, an hmahruaina a tizau. Hma takah goal hnih thun mah se Aizawl FC in goal an thun belh thei lawk lova, SYS pawhin an si phurh sut tur khawpin a tawp an khar tha thei lo bawk.
Chawlhlawk hnu lamah Aizawl FC an khel tha chhunzawm a, chawlhlawk hmain bul an tan tha a, chawlhlaw hnu lamah erawh a tawp an khar tha ve thung. Aizawl FC tan hian hun tawp dawn hnaih minute 87-naah Malsawmtluanga Tlangte chuan an goal thumna thunin an chakna a nem nghet a, 3-0 a chakin point thum an hmu zui ta a ni.
Semi-final luh ngei tuma tan khawh Aizawl FC hian MPL 11 ah vawi sarih khel tawhin tlawm an la nei lova, point 17 an hmuin pahnihna an luah chhunzawm zel. An chung chiaha awm Chanmari FC nen tlawm nei lovin an kaltluang mek a. Chak tam zawk Chanmari FC chu hmahruaitu an ni. Tlawm nei lova Aizawl FC an kal tluan zel laiin team thar ni chunga bul tan tha SYS FC an talbuai zui zel thung. SYS FC hian vawi sarih khelin vawi hnih an dak a, draw vawi hnih an neih tawh bakah tlawm zawkah vawi thum an tang tawh a, point 8 an hmu mek. MPL-ah bul tan tha viau mah se an buai zui ta tlat a. I Day tournament-ah chak an nei lova, MPL-ah chak an nei thei lo ta zel bawk.
- SV FC 2-0 CFC
Thawhlehni a LZ Juice MPL 11 round 7 inkel hnuhnung berah Sihphir Venghlun FC chuan si hnih faiin champion hlui Chawnpui FC an hneh a, point thum an hmu.
Paruknaa awm mek Sihphir Venghlun FC tan hian Lalthanpuia chuan minute 33-naah hmahruaina a goal a thun. Hun rei tak chhung goal a luh belh theih loh hnuin goal hmahruai thuntu Lalthanpuia hian minute 89-naah an goal hnihna a thun zui leh a, a chak hnih thun hmangin an chak. He inkhela goal hnih thuntu Lalthanpuia hi Kuriz man of the match ah thlan a ni.
Sihphir Venghlun FC hian khelh sarih atangin point kua an hmu a, Pathumna leh palinaa awm mek Mizoram Police FC leh Ramhlun Athletic FC te nen an point hmuh inzat mek mah se pangaah an awm a, an chunga awm reng thin SYS FC an lehpel tho thung.