Nimin khan Mizoram hmun hrang hranga blood bank-ah Valentine’s Day denchhena thisen pek rûnpui buatsaih niin, mi 931-in a mamawhte tana hman turin a thlawnin thisen an pe.
Civil Hospital, Aizawl-ah unit 332 pek niin, Synod Hospital, Durtlangah unit 148 pek a ni a, ZMC, Falkawn-ah unit 115;
Lunglei Civil Hospital-ah unit 71; Christian Hospital, Serkawn-ah unit 23; District Hospital, Siaha-ah unit 22; District Hospital, Champhaiah unit 16; District Hospital, Kolasib-ah unit 44; District Hospital, Serchhipah unit 67; District Hospital, Lawngtlaiah unit 62 leh
District Hospital, Mamitah unit 31 pek a ni.
Valentine’s Day puala thisen pek rûnpui hi kum 2010-ah khatih laia LPS Chibai Mizorama a puangtu, tuna AMC councillor ni mek, Chuauzikpuii Pachuau leh a thianten Civil Hospital, Aizawl nena tangrualin bul an tan a. Kum tin huaihawtin, kum 2013 atangin Association for Voluntary Blood Donation (AVBD)-in a bultumin blood bank leh MSACS nen tangtlangin an huaihawt ta zel a. Kum 2013 atang phei chuan Synod Hospital leh district dang pathumah pawh huaihawt a ni a, kum 2014 atang phei chuan district tinah huaihawt a ni ta a ni.
A tan kum hian mi 146-in Valentine’s Day pualin thisen an pe a. Kum 2021-ah hri leng karah huaihawtin mi 467-in an pe a, tun tumah pawh hri leng karah mi 931-in an pe leh a, Valentine’s Day puala thisen pek tawh zawng zawng chu unit 8,740 a ni tawh a ni.