Aizawl: Mizo Students Union (MSU) hruaitute chuan nimin khan Aizawl Press Club-ah thu thar thehdarhtute an kawm a, school thenkhata scholarship khawihtu inthlahdah avanga zirlaiten an scholarship dil an dawng lo tur chu pawi an tih thu sawiin, hemi chungchangah hrem ngai an awm chuan an chungah hma la turin Mizoram sorkar an ngen.
MSU President B Lalkhawngaihzuala chuan scholarship board-ten theihtawpa hma an lak laiin, school thenkhata scholarship khawihtu, Institution Nodal Officer-te inthlahdah vanga zirlaiten an scholarship dil an dawng lo tur hi a pawi an tih thu a sawi a. Tunah hian Cherhlun Higher Secondary School (Adhoc)-a zirlai scholarship dilte chu an school-in verification an tihsak loh avangin kumin hian scholarship an dawng thei dawn lo tih sawiin, “MSU chuan hei hi pawi kan tiin a thawktute kan dem tak zet a. Hrem ngai an awm a nih chuan a tul anga hremna min lekkawhsak turin sorkar thuneitute kan ngen a ni,” a ti.
MSU president chuan thu an dawn danin, Lungrang ‘S’ High School (Adhoc)-a thawktute chuan scholarship buaipui an thiam loh chhuanlamin an zirlaite tan an buaipui thei lo nia an hriat thu sawiin, zirtirtu naupangte tana intuaithar peih tawh lo leh ngaihsak peih tawh lo an awm chu pawi an tih thu a sawi.
MSU tar lan danin kum 2023-24-a Mizo zirlaiten scholarship an dawn tur chu tunah hian 1st leh 2nd Installment sem zawh a ni tawh a. Ministry lamah 3rd Installment an dil mek Rs nuai 806 a ni a. Tunah hian zirlai la dawng lo post matric-ah zirlai 5,450 leh pre matric 1,155 an awm mek a ni.