Brazil-a Rio de Janeiro state chhung tlangrama tun hnaia ruah nasa tak sur avanga lei min leh tui lianah mi 18 vel an thi tawh a. Chhiatna thlenna hmunah hian chin hriat loh eng emaw zat zawn an la nih avangin thi hi an pun rinna a lian hle.
Fire department chuan a tuar na ber, Petropolis region-ah chuan sipai 180-in chhanchhuah hna an thawk mek tih a sawi a. Thawhlehni khan darkar thum lek chhungin ruah cm 25.8 zet a tla a, hei hi a hma ni 30 chhunga sur zet dawn niin an sawi.
Social media-a Petropolis khawpui leh a bul hnai district-a thil thleng thlalak leh video an thehdarhah chuan lirthei leh inte chu lei minin a hnawl nasa hle a, khawlaiah tui a lian nasa hle bawk.
Petropolis-a an city hall-in thuchhuah a siamah chuan ruah tam lutuk avangin chhiatna thleng leh a tuartu an tam hle tih tar langin chhanchhuah leh chhawmdawl hna thawh mek a ni tih a sawi.
Russia-a zin mek, Brazilian President Jair Bolsonaro chuan Twitter-ah sorkarin a rang thei ang bera puihna a pek nghal tur thu a tar lang a. “A tuartu chhungkuate Pathianin venghim rawh se,” a ti.