Hun eng emaw chen Aizawl Hospital lamah enkawl a nih hnuah, Feli Fanai chu Ebenezar Medical Centre lamah enkawl tura sawn a ni.
Lengzem khawvela hriat lar em em Feli Fanai hi December 20, 2024 khan a taksa a chauh zual deuh avangin Aizawl Hospital panpui a ni a, damdawi in panpui a nih hian ICU lamah enkawl tura dah luh nghal a ni a. Hemi hnu hian damdawi lama mithiam te’n theihtawp chhuahin an enkawl a, thisen pawh vawi eng emaw zah pek a ni. Hma a rawn sawn thin dawn viau a, mahse, duhthusamin hma a sawn chak hleih theih loh avangin January 6, 2025 tlai dar 5 khan Aizawl Hospital atangin Ebenezar-ah phurh thlak niin, ICU-ah dah luh nghal a ni.
‘Leng Dang Tang A Bel’ hitmaker hi damdawi chi hrang hrang an pekte hi duhthusamin a thawk tha hlei thei lo va. Tun dinhmunah a thin (liver) lam a that loh avangin a pum pawh a puar a. A dinhmunin ziaawm lam a pan chak deuh beiseiin, an enkawlna damdawi in hi sawn a nih thu dawn a ni.
Hun rei tak atanga ICU-a inenkawl deuh reng a nih avangin, Feli Fanai thian hnai tak takte chuan an inenkawl senso tlem a lo phuhruk ve theih nan tiin bawm an dawh a. Feli Fanai tan hian remchanga a sum zawnga tanpui thei an awm chuan tiin, phone no. 9862169305 (Print Mart) ah hian pek theih a ni a. Mi mal tawngtai sakna pawh an ngen nghal bawk.