- Dr. C. Lalrampana
A KAMKÊUNA
Covid-19 (SARS Cov2) len lai khan mirethei chhuanchham tanpui ngaite tanpui kawngah khan khawvel hnamdangte aia titha bik leh rinawm bik, tlawmngaihna ngah bik angin mahni infak rêng rëng khan kan khawsa kha a ni a. Thilpek chhete pawh mi tute emaw hlan hlek ila, chapo takin titha bik ni awm takin Local Cable TV entir nan: LPS & Zonet-ahte kan inpholang chuai chuai thin. Chutih laiin India ram phai vaiho leh khawvel ramdanga an mihausate leh milar (celebrities) hote’n keini Mizote aia nasa zawk leh chhenfakawm zawkin mirethei chhumchhia tanpui ngai leh klhaichhuah ngaite chu an tanpuiin an khaichhuak nasa zawk daih lawi si a ni. Mizo tawng thufingah chuan-”Mahni infak leh sakhi ngalah engmah a bet lo” tih a ni a. Mi fak pawh nghak hman lovin mahni kan infak zung zung thin a ni ber mai! Kan ngaihsan êm êm Pathian hnam thlan Israel fate khu tluklohna lai lian tak kan nei. Anniho khu chuan tumah an fak tlawr ve vak vak ngai lova, an sawichhe chiam chiam ngai hek lo. Mi fak leh sawisel an chin ve lohna chhan ber pawh eng dang ni lovin, mi rilru tihnat an hlauh vang a ni.
RINAWMNA CHU ENGE NI?
Rinawmna ‘Honest’ tih hi Latin tawng ‘honestus’ atanga lak chhuah a ni a, grik tawng chuan ‘Dikaios’ tih a ni a, a awmzia chu “zahawm” emaw “zah” emaw” tihna a ni a, thutak sawina; ethical lam hawi; dik; dawt sawi leh bumna tel lo tihna a ni. Tin, dik, zahawm, fel, fimkhur, thu bul nei, nungchang, chhe thei lo, tha, ethical, thudik, rintlak tihna a ni. Kum 1300 vel khan ‘honest’ tih hi “zahawm leh hmel felfai” tihna atan an hmang nasa hle. Tunlai hian midik, rintlak, rinawm sawina atan an hmang zawk mah a ni. Khawvela hnam rinawm eiruk tlemna ber ram 10 leh an mark hmuh indawt dante chu: Denmark 90, Finland 87, New Zealand 85, Norway 84, Singapore 83, Sweden 82, Switzerland 82, Netherlands 79, Germany 78 leh Luxembourg 78-te an ni. Hmeichhia nge mipa hi rinawm zawk tih chungchangah hian chiang taka hriat a harsa hle. Mahse, zirchianna thenkhatah chuan hmeichhiate hi mipa aiin an rinawm zawk nia sawi a ni. Mizo zingah erawh mipa aiin hmeichheho hi an vertherin an depde zawk niin a hriat theih. Zing tawngtai inkhawm bawhpelh ngai si lo hmeichhe verther, depde, phakar leh rinawm lo an tam êm êm lawi si a ni. Chawlhni chawhma leh chawhnu inkhawm thulh ngai lo: inkhawmpui hrang hrang kalkim, sunde sikul kaikim, khuang rik hlek apianga lama phar chhuak nghal zel thei, thuhriltu thusawi karlaka lo amen-hallelui chiam nghal zel thei, buhfaitham leh thawhlawm chihhrang hrang hlah ngai lo, mahni eizawnna lama verther, depde,phakar, rinawm lo leh thenawm khawvengte laka duham êm ém si, an nuna takna, dikna, rinawmna hmuh tur awm hauh si lote hi Zoram hmun tinah hian an vir suau a ni ta ber mai!
RINAWMLOHNA VE THUNG CHU?
Rinawmlohna ve thung ‘dishonest’ hi latin chuan ‘dishonestus’ tih a ni a, grik chuan ‘Dolos’ tih a ni. Mi nungchang emaw, nundan emawa bumna lantir, rinawm lohna leh nungchang dik lo: Verther,depde, rinawm lo tihna a ni. Rinawm lohna hi mipa leh hmeichhe pakhat chauh nena khaikhin chi a nih loh laiin, economics leh psychology lama zirchianna engemaw zatah chuan hmeichhia aiin mipain rinawm lohna an ti tam zawk tih hmuhchhuah a ni. Alessandro Bucciol leh a thawhpui te chuan Italy ramah khuan hmeichhia aiin mipain bus chuan man pe duh lova theprelh ching an tam zawk tih an hmuchhuak a ni. Khawvela mi rinawm lo, eiruk tamna ber ber ram leh an mark hmuh zat indawt dante chu: Somalia 11, South Sudan 13, syria 13, Venezuela 16, Yemen 17, equatorial guinea 17, Haiti 17, Nicaragua 17, North Korea 17, Libya 18 leh Turkmenistan 18-te an ni. India rama eiruk tamna state 10-te leh an case neih zat 2024-anga tarlante chu-Maharashtra 749, Rajasthan 511, Karnataka 389, Madhya Pradesh 294, Odisha 287, Tamil Nadu 261, Haryana 246, Punjab 227, Kerala 178, Gujarat 176 -te an ni. Kum 2024 December thla thleng khan Mizoram Lokayukta hian kum 2018-a din a nih a?ang khan eiruk thubuai 11-ah complaint a dawng tawh a, chung zinga pali chu state chhunga Anti-corruption department-ah sawn a ni tawh a, thubuai pathum chu chinfel a ni tawh bawk. A lan danah chuan Mizoram chu corruption case ngah lo ber kan ni. Mahse, corruption kairualna ber kan ni ngei ang. State dangte chu sawrkar department pahnih khatah leh kawng hnih khatah rinawmlohna eirukna a hluar a, Mizoramah erawh sawrkar department tinah leh kohhran, NGO, pressure group hrang hrang bakah vantlang nunah rinawmlohna ‘dishonest’ leh eirukna (corruption) hian bu a khuar nghet tawh hle niin a lang. Chungte chu hetiang hian tarlang ila:
SAWRKAR DEPARTMENT-AH:
Mizoram sawrkar hnuaiah department 41 vel a awm. Eng department-ah pawh hian eirukna hian kua a hreuh niin a lang. Hun eiruk (time corruption); aikal lak (proxy); bungraw eiruk, thamna (Bribery); thuneihna dinhmuna ding mi thiltih a nghawng theihna tura thil hlu tak hlan, pek, dawng, dilna thiltih. Thamna (Bribery) hian thutlukna dik siamna a tichhe thei a, duhsak bik leh inthlauhna a thlen thei bawk. Hna inpek chungchanga hleih neihna (Nepotism): mi emaw, pawl emaw, midangte tihchhiatna avanga dik lo taka duhsakna pek an nihna.
Thuneihna hman dik loh, Thuneihna dinhmun luahtu mi pakhatin an thuneihna hmanga thutlukna siamnaah nghawng a neih emaw, rinawm lohna emaw, bumna hmanga thil a tih emaw hian a lo thleng thin. Service rei duh vanga kum ziah naupan luih, lehkhapuan leh Pisa bungraw hrang hrang hawn ruk, hralh ruk, mi pek, kohhran leh pawl tana pek leh a dang sawi tur a tam hle. Hengte hian sawrkar department hrang a rûn mek. Um khat chu pisaa ka thawh laiin midang haw vek hnuah hna laklawh vangin ka awm tlai a, ka chhuah chuan daftry room atang hian Pisa venghimtu tur ber chowkidar chuan xerox paper tel (realm) 3 vel hi a rawn pu chhuak ûr mai a. Mi hmu thut chu a phu nasa kher mai! Daftry room-ah kirlehin a dahleh nghal vat a. Ka hawsan ta a ni. A hnuah kan Pisa bul lawka xerox khawl neitupa hnenah chuan tlawm deuhin a hralh thin tih ka hrechhuak ta a ni. Development fund bakah hetiang hlem hletnableh eirukna hian sawrkar Pisa tinte hi a rûn nasa hle thin a ni.
KOHHRAN HRANG HRANGAH
Mizoramah Kristian pawl hrang hrang za (100) chuang zet kan awm mek. Hei bakah hian pawl tê nau neuh neuh tam tak a la awm cheu bawk. Kohhran tinte’n kalphung hran theuh neiin Thurin innghahna (fundamental belief) leh inkaihhruaina dan (manual bye laws) hran theuh neiin kan kohhran theuhah thahnemngai takin rawng kan bawl theuh thin. Kristian zaa 87.16 awm mekna state kan ni lehnghal. Kohhram rawng bawl nge kan nih Pathian rawngbawl? Heti chung hian kohhran mipui thawhlawm tlingkhawm, Pathian chanpual sawmapakhat leh thilpek eiru duh, thaibo then duh kohhran pawl tinah an awm fo mai thin. Kohhran pakhata an sum kawltu phei chuan a thawhpuite hriatpui lohvin bike lei nan kohhran sum a hmang puk a, tun thlengin a rulh thu hriat a ni lo. Local auditor-te’n an thai bo (write off) ta ringawt nia sawite a awm nawk mai! Kohhran bungrua (equipment & property) hrang hrang pawh mahni ta bil emaw tia mahni duhdan dana chinglet thinte pawh an awm fo bawk. Hetiang hlemhketna leh thlarau sual hian kohhran pawl tinte hi a rûn ve fo thin.
NGO & PRESSURE GROUP-AH
YMA, MHIP, MUP, MZP, MSU leh association pawl hrang hrangah sum lama rinawmlohna leh eirukna, hlemhletnain bu a khuar hneh hle. Pawl tam berte kehchhiatna leh inlungruallohma thlentu lian ber a ni thin. Heng NGO leh pressure group-a sum vawngtu leh ziaktu sum vawn leh cash book inmil hlei thei thin lote hi thil zahthlak tak a ni. Hlemhletna leh eirukna hian kua a hreuh nasa hle. Pawl bungrua leh thil neih hlu tak takte pawh mahni ta bil ang maia hauh hlur mai thinte pawh an awm fo.
SUMDAWNNA KAWNGAH:
India leh Bangladesh rama hman tur bika ruamhman thil man bituksa maximum retail price (MRP) ngai pawimawh duh lova marker Pena thaichhiaa to uchuak taka lehkhathem dang Bela a man ziak chawpa hralh duh Kristian verther tak leh depde tak tak an tam hle. Mahni kohhran theuha inhmang tha tha leh thahnemngai ngai an ni duh chawk lehnghal. Sum hmuhna turah erawh khua an hmu ngai lo. Khawizu, kurtai, bawnghnute, buhban, bawnghnute giu, mizo artui, aieng, futui, nimbutui, hatkoratui, saptheitui fir dik tak, engmah pawlh dal loh hmuh tur lei tur lah awm tawh nahek suh; kawng tinrengah rinawmlohna hian min chim hneh hle a, rinawmlohna luipui hian min chimpil mek a ni.
A TLÃNGKAWMNA
Mizote hi insawi rinawm viau thin mah ila kan nitin nunah leh khawsak dan hian kan rinawmlohzia a takin a lailangleh tho si thin. Tarlan takte bakah pawh khian natna enkawlna (health) lamah leh zirna (education) lam thlengin sumdawnna (commercial) rilru verther nen kan inchiahpiah hneh tawh lutuk a insiamthaleh tur chuan a buaithlak viau tawh ang. Tin, insakna hmanraw hrang hrang-balu, rawra, cubic lung, bolder, iron rod, leirawhchan, thingzaiahte pawh rinawmlohna hlirin min bâwm khat so lek luk ni berin a lang. Balu ip khata tel tin 2 zel thunsa leh rawra tin 2 zela thunsa a tlin leh tlin loh ka teh thaleh ngat a, tin ½ zelin a tling lo ve ve a ni. Iron rod pawh a sei zawng an sawi aia tawi vek a ni a, a siamtu company-te pawh a ni lo, an hrilh a, brick pawh no. 1 ni lo pui no. 1 an ti duh a, cement pawh a tharlam thei ang ber an zuar thup a, cubic lung lah inchi 8-10 bial vel cubic lung dik tak an ti duh a, brick lenzawng dik tak lah hmuh tur awm tawh hek suh, Thingzai phek leh a mum (tal) size dik tak hmuh tur lah awm tawh hek suh. Motor parts lah original an ti deuh vek a, buhfai, sa leh thil dang buk tling lei tur lah awm tawh nahek suh. Chawhmeh, thei rah leh thlai zuar lahin a têl an thennawi a, Huan lo ram leh chuktuah huana thlai ilo, sanghal dil, tuikhuah hima ram awm thei hek suh, inhmun lo ram lah land value aia to uchuakin an duh tawk tawk an chhiar a, market value phuahchawwpin an zuar a, LSC thlawk thei, a ram leilung tak tak awm si lo leitirin mi an bum a; sawrkar lahin engmah tingam lovin a uipui tuilian thlir liam mai mai bawk si. kan zonunmawi tlawmngaihna, rinawmna, taimakna. dikna leh reng hmuh tur a awm tawh si lo. Chutih ahnekin khing rinawmlohna chihrang hrangahte khian Mizo mipuite hi kan rinawm êm êm mai si hi a makin a van rapthlak tehlul êm! Internet hmanga bumna leh rinawmlohna kawngah lah kan rinawm êm êm bawk si! Meng leh meng, Nutling leh Nutling, patling leh patling, Kristian keh Kristian, mizo leh mizo, chhungkhat leh chhungkhat, unau leh unau, thenawm leh thenawm, kohhran leh kohhran, sawrkar leh mipui, mipui leh sawrkarte hi rinawmlohna hrang hrangah hian kan rinawm êm êm a, kan ineitawna kan inbumtawn vel mai mai a lo ni e. He kan rilru puthmang (mindset) tha lo tak leh dik lo tak hi kan thlaka kan bansan vat loh chuan kan ramah hian dikna, takna leh rinawmna hian engtikah mah hmun a chang tawh lovang. Sawrkar hian heng hlemhletnate hi rorelna dik ( Rule of law) hmangin thununin kaihruai se, notification hrang hrang chhuah chamchi ringawt lovin a takin umzuiin bawhzui nghal zel se’ng chuan hetiang êm êma rinawmlohnaa kan rinawm êm êmna hi a bibo thei ngei ang. Kalphung thar sawrkar hian engtinnge a bawhzui dawn le I lo thlir thap phawt mai teh ang u.