United States chhim lam hmun thenkhatah an beisei lawk loh takin vur tam tak a tla a, thlawhna thlawk tur 2,100 chuang thulh tir an ni a, mi pali vel thi an awm tawh bawk.
Texas, Louisiana, Mississippi, Alabama, Georgia, South Carolina leh Florida-ah vur hi thahnam tak a tla a, hmun thenkhatah chuan inches 10 chuang a tling.
Rinlawk loh taka khaw awm dan uchuak tak lo thleng thut avang hian thlawhna bakah lirtheite pawh a che hlei thei lo va. Texas, Georgia leh Milwaukee-ah chuan khaw vawt thut kaihhnawihah hian mi pali vel thi an awm tawh niin ABC News chuan a tar lang.
Houston-a thlawhna tumhmunte chu khar a ni a, Tallahassee International Airport-ah pawh Thawhlehni chawhnu atang khan thlawhna chhuak tur chu thulhtir vek a ni.
Houston-ah hian George Bush Intercontinental Airport leh William P. Hobby Airport te erawh Nilaini (India-a zan rei lam) atang chuan hawn leh theih beisei a ni tih ABC News chuan a tar lang.
Port Houston pawhin Thawhlehni leh Nilainiah an inkhar vek tih an sawi bawk.
Vur tla hi New Orleans, Louisiana chhehvelah pawh a awm a, mi chengte chuan kum 1963 hnu lama a tlak nasat ber tum niin an sawi hlawm.
Louis Armstrong New Orleans International Airport-a airline hrang hrang chuan an thlawh tur an thulh hlawm.
Louisiana-ah hian sikul leh sorkar pisate chu khar a ni a. Houston atanga New Orleans leh Georgia hmun thenkhatah sikul khar a ni.
Thawhlehnia Louisiana Governor Jeff Landry-a’n thuchhuah a siamah chuan ‘khaw awm dan uchuak tak avang hian inkaihhruaina’ siam a nih thu a sawi.
“Ni sarih lo awm leh tur hi khua a vawt dawn hle a. Kawng a tlang tha tih a chian loh chuan kal chhuah loh tur a ni a. Khaw laia vur inchap hi a hlauhawm em em a, a nalin tawlh palh a hlauhawm em em a ni,” tiin Landry hian thuthar lakhawmtute a kawmnaah a sawi.
Savannah, Georgia-a mayor pawhin hurricane leh tropical storm dawl zo turin an inbuatsaih tha tawk tih a sawi a. Vur tla chuan thil a tibuaithlak hle niin a sawi bawk.