Aizawl: Supply Minister B Lalchhanzova chuan Mizoramah sorkar leh tlawmngai pawl (NGO)-te thawh hona nasa zawk neih a la tul thu a sawi.
Nimin khan tlawmngai pawl, Cod Nerc, Mizoram leh Impulse NGO Network, Shillong te chuan minister pisaah sahimna zawnga Mizorama raltlante chhawmdawlna kawnga an hnathawhte thlirletin, zirchianna an nei.
He huna C. Lalmuanthanga, State Team Lead Impulse NGO Network leh Cod Nerc Chairman ni bawkin a tar lan danin pawl pahnih thawkdunin raltlan chhungkua mi 500 hnenah thla ruk chhung ration an pe a. July, 2023 khan Champhai district tan damdawi in khum 100 leh damdawi in mamawh CMO Office, Champhai an pe a. Raltlan leh a lo dawngsawngtu khawtual mi tan thlai thar rang leh long term crop (Orange & Apple) chinna turin chhungkaw 241 hnenah tanpuina pein ram acre 317.5-ah thlaite chin a ni.
B Lalchhanzova chuan Mizoramah sorkar leh NGO thawh hona nasa zawk neih a la tul thu sawiin mipui thleng phak tak tak tura hmalaknaah NGO-te hian sorkar tha nasa takin an tichak thei tih a sawi a. Sorkarin NGO-te a thawhpui thiam a, NGO pawhin sorkar puih duhna rilru pu chunga department-te nen thawhho theihna kawngte dap thiam turin a chah bawk.
Minister chuan raltlan leh anmahni lo chhawmdawltu khuate tanpuina tur project chu a hova tan an nih dante leh a hlawhtlinna bakah a nghawng neihte thlirletna hun an hmang thei chu lawmawm a tih thu a sawi bawk.
Impulse NGO Network Chairman Tashi Rapten Barfungpa pawhin agriculture, horticulture department leh ATMA-te puihna an dawn avangin lawmthu sawiin Mizorama sorkar department-ten NGO nena an thawhhona chu enttawntlak a tih thu a sawi bawk.