Aizawl: ZPM President Lalliansawta chuan ram rorelnaa Pathian ram tungding leh turin Pathianin ZPM a ruat mek tih a sawi.
Nimin khan ZPM Mara District Headquarters office, Siaha-ah mi thar lawm luh inkhawm hmanpuitu ZPM President Lalliansawta chuan tun hmain Zofate hi lo neiha eizawnga intodelh taka hun an hman laiin, mau tam leh rambuai nangin retheihna bawihah an lut a. Chutih lai takin India sorkar hnuaia awmin central atangin ram hmasawnna tur sum leh pai a luang lut a. Retheihnain a chim mek lai a nih avangin, mahni tanghma haina rilruin an thinlung a luah chho a, chutianga kum 40 dawn hun hman a nih laiin Pathian ruat zelin ZPM party an lo lang tih sawiin, “Kan ram rorelnaa Pathian ram tungding leh turin, vawiin hian Pathianin min ruat mek a ni,” a ti.
Lunglei East bialtu MLA Lalrinpuii, Health Minister pawhin thu sawiin, health department hi department lian tak, tun hmain hruaitu thenkhatten politics khelhnan an lo hman thin avangin, department chhungah thil siam rem ngai leh hmalakna tur mipui nghawng thil a tam hle tih sawiin, “Hmun thenkhatah sub-centre, PHC, CHC kan enkawl zawh bak leh function theih si loh an lo siam duah mai a, chu chuan thawktu indaih lohna a thlen nasa hle a, kihhnawk tam tak min hnutchhiah a, kan thian fai mek a ni,” a ti.
ZPM Mara Dist. Hqrs President KH Beithie kaihhruai inkhawmah hian ZPM president-in an party-ah mi thar eng emaw zat a lawm lut a ni.