Uefa Champions League khelh dan phung thara league phase chu Nilaini zan khan khelh zawh a ni ta a, knockout round a intan dawn ta.
Manchester City chuan si an phurh zet hnuah Club Brugge lehthalin play-off an lut phak ta hram a. Aston Villa leh Arsenal chuan round of 16 lut chiang tawh, Liverpool zawmin an tlang bawk.
Aston Villa laka 4-2-a tlawm, Celticpawhin play-off an khelh dawn a, British team pangain league phase an paltlang phawt.
Pakuana atanga 24-na inkarte chuan play-off an khel dawn a, February 11-12 leh 18-19-ah khelin a chak zawkin round of 16 an lut ve dawn.
Intum turte hi Zirtawpni zan hian pawh a ni dawn a; mahse, kal dan ruahman sa a awm avang leh league phase-a an dinhmun azirin intum thei tur a hriat tawh.
Celtic leh Manchester City chu European champions Real Madrid tum thei an ni a, Bayern Munich hmachhawn thei an ni bawk.
Play-off paltlangte pawh hian round of 16-a an hmachhawn tur thlengin hriat theih ruak a ni.
City leh Celtic hi an tlang a nih chuan Atletico Madrid emaw, Bayer Leverkusen emaw round of 16-ah an tum ang.
Juventus pawh AC Milan tum thei an ni a, Paris St-Germain pawhin Ligue 1-a an elpui, Monaco leh Brest hmaa ding thei an ni.
Liverpool leh Barcelona chu league phase-a a chung pahnih hauhtu an nih avangin final hma chu an intum thei dawn lo.
Reds hian round of 16-ah Monaco, Brest, PSG leh Benfica zinga mi an tum thei dawn a, Barca pawhin hei tho hi a ni.
3-na Arsenal chuan Feyenoord, Juventus, AC Milan leh PSV an tum thei a. Aston Villa-in Sporting, Club Brugge, Atalanta leh Borussia Dortmund an tum thei bawk.
Round of 16 hi March 4-5 leh 11-12-ah khelh a ni ang.
An tum theih tur hi lang ruak mah se tu tak nge tih chu February 21-ah a hriat theih dawn a. Chuta tang chuan final thlenga an tum tur pawh a lang ruak ang.