Russia-in Ukraine a rûn meka tel ve, North Korean sipaite chu nasa taka thihna leh hliam an tawrh hnuah ral hmatawng atangin koh kir an nia sawi a ni.
South Korea-a Yonhap news agency chuan Pyongyang-in Russian sipaite pui tura sipai 10,000 vel a tirhte chu chawlhkar eng emaw zat hmatawngah hmuh tur an awm tawh lo niin Thawhlehni khan a tar lang a. Ukraine leh US chanchinbute pawhin an hei hi an tar lang.
North Korea-in indonaa sipai a tir ve kha a tirah chuan indona a tihpunlun zual hlauh hle a ni.
South Korea-a National Intelligence Service (NIS) chuan North Korean unit-te hi Russia-a Kursk region-ah chuan ‘January thla laihawl’ atang khan indonaah an tel tawh lo tih AFP news agency an hrilh.
“A chhan lian berah chuan thi leh hliam an tam lutuk vang a nih a rinawm a; mahse, a chhan dik tak erawh ngaihchan mek a la ni,” tiin spy agency chuan a sawi.
Ukrainian sipaite pawhin Zirtawpniah tawh khan North Korean sipaite hi an inchân nasat em avangin an tawlhkir niin an lo sawi ve tawh bawk.
Ukraine hian a hmain August thla atanga ramri kâna Kursk an beih hnuah North Korean unit sipai eng emaw zat man leh thah an nei tih an lo sawi tawh thin.
President Volodymyr Zelenskyy-a pawhin North Korean sipai an man nia a sawi thu an zawt fiah lai thlalakte pawh a tichhuak.
January thla laihawl velah khan NIS chuan North Korean sipai 300 chuang thi awm tawhin 2,700 velin hliam an tuar tawh tih an lo sawi tawh.
Pyongyang leh Moscow-in official-a an la puan ngai loh ni mah se Kursk-a North Korean sipaite dahte hi Russian sipaite pui tur leh Ukraine sipaite um chhuak tura tih an ni a. Thla ruk dawn an awm hnuah pawh Ukraine hian ram zau tak an la luah zui reng tho.
Seoul chuan a hmain sipai an thih nasat avangin Pyongyang chuan a dang tirh belh leh a tum tih a lo sawi tawh.
Kyiv leh khawthlang ramte chuan indonaa North Korean sipai an tel ve chu Russia-in Ukraine a rûn mekah buaina tipunluntu mai a nih theih thu an lo sawi tawh a, tha an ti lo hle a. Hetih lai hian Pyongyang leh Moscow hian inkungkaihna tihnghetna atan an hmang thung.
Nikum khan Russian President Vladimir Putin chuan a tih ngai loh tak tiin nuclear ralthuam nei, North Korea hi tlawhin ram venhimna lamah inremna tam tak an ziak nghe nghe.