Uttarakhand-a 38th National Games khelh mek zelah Mizo nulate chu Nilaini tuk khan a vawi khat nan hockey-ah an inlan tan a, an khelh hmasak berah a Manipur nen 2-2-in an hnehtawk.
Haridwar-a inkhelah hian Mizoram hi an khel tha hle a, khelho tam hman lo mah se an inman a, goal an nawr pawh a na, kawng hrang hrangah an chungnung zawk a, goal-a an vanduai avangin an chak zawkah an tang lo chauh tih theih a ni.
1st quarter-ah a Manipur-in goal an thun hmasa a, he goal hi ennawn chuan goal-a pawm âwm loh tak a ni a; mahse, D line pawn atanga an vuak luh chu Mizoram player-in an goal-a a dan per lut niin long corner tur a nih hmel hle laiin referee-in goal-ah a pawm a. Sawisel ngial mah se a sawt lo.
2nd quarter-ah Mizoramin an nawr a, F.Lalbiaksiami’n tha takin goal hnih a thun zui a. Mizo nulaten hma an hruai phah.
Hma an hruai lai hian B Lalrinpuii leh Manipur player pakhatin green card an hmu a, chumi hnu lawkah Rinpuii hian yellow card a hmu ve leh a. Player pakua chauh an nih laiin Manipur hian an tam zawkna chhawra na taka an nawr zarah remchang an hmu a, an sipurh an sut ta hlauh a ni.
Quarter hnuhnung pahnihah Mizo nulaten goal khung ngei tumin an nawr a; mahse, an kut a kal lo laklawh a, an vaw lut thei ta lo. Penalty corner vawi ruk lai an hmuh pawh an chhawr tangkai zo lo.
Mizoram hian Zirtawpniah inelna thlengtu, Uttarakhand an hmachhawn leh ang a, Pathianniah Maharashtra tumin Thawhtanniah Jharkhand an hmachhawn leh dawn bawk a, pool-a an khelh tur an khel zo dawn a ni.
Football (mipa)-ah Mizoram chu an tla ta thung a. Thawhlehni khan Pool B-ah Mizoram hian Assam chu si thum faiin an hneh a; mahse, an pool-a inkhel dangah a Uttarakhand-in 4-1 laia Goa an hneh ve si avangin point hmuh zat inangah goal difference nei tha zawk an nih avangin a thlengtu hian semi final an lut ta zawk a ni.
Mizoram hian an khelh hmasakah Uttarakhand hi 2-2-a hnehtawkin Goa laka si hni faiin an tlawm thung lakah hian K.Lalremmuana, Peter Lalrinhlua leh Lalengmawia te goal hmangin hnehna an chang.
Uttarkhand-in Goa an hnehna result azirin an pool atanga semifinal lut thei tur an ni a; mahse, Uttarakhand chakna a san tak em avangin an beisei leh tum angin semi final an lut zo ta lo a ni.