Aizawl: Mizoram Cooperative Apex Bank Ltd. Executive Committee chu an chairman Lalnunsanga kaihhruaia thukhawm chuan, mi mal, pawl leh kohhran hrang hrangin loan an dilna, a vaiin Rs nuai 3,525.27 pek chhuak a remti.
Thawhlehnia Tuikual South-a Board Meeting Room, Head Office-ah thukhawm chuan, society hrang hrang ten Apex Bank-a share lei an dilna lo enfiahin an pawm. Hetih rual hian, mi malin sumdawnna (business), thlai chin/ran vulh leh lo neih (Agri & Allied Agri), housing loan leh PMEGP loan an dil, a vaiin Rs. nuai 2,245.27 an pawm a. Kohhran hrang hrang tana biak in sakna loan pek a remtih hi Rs. nuai 1280 niin, he’ng loan pek chhuah a remti hi a vaia belhkhawmin Rs nuai 3,525.27 a tling.
Nimin vek khan Apex Bank chuan Aijal Club-ah thawktu Clerk 27 leh Officer pathum lak thar te pualin, ni thum awh induction training programme an hmang a. Pankaja Borah General Manager, NABARD, Mizoram Regional Office chuan he hun hi hmanpuiin, Mizoram hmasawnna tur atana taima leh rinawm taka thawk turin thawktu lak thar te a fuih.
Tun dinhmunah Apex Bank hian deposit Rs vbc 1,573 an dawn atangin loan Rs vbc 1,199 pe chhuakin, CD Ratio tehfung 76% a ni.