Nilainia Delhi assembly inthlan vote thlak zawha exit poll lak hrang hrangah BJP chu sorkarna siam tura sawi lawk a ni a, kum 10 lai ro lo rel tawh, Arvind Kejriwal-a kaihhruai Aam Aadmi Party (AAP) an paih thla dawn niin an sawi.
Exit poll hrang hrangah chuan AAP hian pahnihna an hauh dawn a, Congress chu pathumna ni turin dah a ni a. Hei hi rorel lai chuan an pawm lo hle.
“Tun hi inthlan vawi lina a ni tawh a, inthlan apiangin exit poll hian AAP hi sorkar turin a ti ngai lo. Arvind Kejriwal-a hian Delhi mipui tan a thawk a, Aam Aadmi Party lawmna tur result kan hria ang a, sorkarna kan siam ang,” tiin an hruaitu, Sushil Gupta chuan news agency ANI hnenah a sawi.
AAP hruaitu hian NDTV hnenah pawh an party chuan result a chhuah niah chiang taka hnehna an chan tur thu a sawi bawk.
Chanakya Strategies chuan AAP hi bial 25-28 la turin a dah a, BJP-in bial 39-44 leh Congress-in bial thum vel la turin a ti a. DV Research pawhin AAP hian bial 26-34, BJP-in 36-44 leh Congress chu bial la miah lo turin an dah.
AAP hian a zawna a vawi li nan chak leh an tum a, BJP hian kum 1998 hnua thuneihna chan leh an tum ve thung a. Congress pawhin kum 15 ro an rel tawhnaah kir leh an tum bawk.
Delhi inthlanah hian Nilaini zing dar 7:00 atanga vote thlak tanin tlai dar 6:00 thleng thlak a ni a, vote 57.89% a tla.
Kum 2020 inthlanah khan 62.82% tlain kum 2015 khan 67.47% a tla bawk a. Kuminah hian a tla chhe viau a ni.
Vote tlate hi Inrinni hian chhiar a ni ang.