Mizoram Snooker & Billiards Association (MSBA) buatsaih Mizoram State Snooker championship 2024-25 final-ah Lalrina Renthlei chuan Lalsangzela hnehin a champion.
Final hi best of 7 (frame li la hmasa sa chak)-a khelh niin MSBA Snooker Ranking-a No. 1 leh No. 2 inhmachhawn an ni a. Bul tan tha zawk, Mizo snooker player hriat hlawh bera chhal ngam, Tuikhuahtlang, Aizawl tlangvalin 4-2-in hnehna changin nomawi a la.
Lalrina hian tha taka bul tanin frame hmasa pahnih lain hma a hruai nghal a; mahse, tawnhriat tam tak nei tawh, Khatla South tlangval a inthlahdah duh bik lo va, frame thumnaah insang marin a hnufualna chu 2-1-ah tizim.
Frame linaah Lalrina rawn langsar lehin an inkar chu 3-1-in a tizau leh a, frame nganaah Zela’n la velehin hmahruaitu zawk tan inthlahdahna hun a siamsak duh bik lo va; mahse, frame ruknaah Lalrina a dingchang zui a, 4-2-in a chak ta a ni.
Lalrina hian semi final-ah PB Liansangzuala, Dawrpui Veng a hneh a, Zela hian Zonuntluanga, Electric Veng hnehin final a inhlangkai ve thung.
Championship-ah Mizoram chhunga snooker player 42 an tel a, Thawhtanni atanga MSBA Hall, Hawla Indoor Stadium, Republic Vengthlanga khelh tan kha a ni.
Final-a inhmachhawn pahnih, Lalrina leh Zela te hi January thla tawp lama 91st Indian National Billiards & Snooker Championship, 2025, Indore, Madhya Pradesh-a khelh zawh taka Mizoram aiawhin inlan dun an ni nghe nghe.
He inelnaah hian Lalrina hi Top 16-ah langin Zela hi Top 32-ah a lang bawk a. Senior level-a national championship-a Mizoramin record an neih that ber tum a ni nghe nghe.