Aizawl: Chief Minister Lalduhoma chuan Lengpui Airport chungchangah mipui tana tha tur ngaihtuah chungin thutlukna an siam dawn a, mi dang sawiselna avang ringawtin an tum an thulh dawn lo tih a sawi.
Zirtawpnia Mizoram Busget Session thutkhawma Tuirial bialtu MLA K Laldawngliana’n, ‘Mizoram sorkarin Lengpui Airport, Indian Airforce kuta hlan/hralh tuma hma a lak mek hi tha ka ti lo va. Titawp rawh se’ tih private resolution sawihona hmawr a bawknaah Chief minister Lalduhoma chuan Lengpui Airport chungchangah inpuhtawn tur vak an awm loa a hriat thu a sawi a. Airport chu enkawl a hautak avangin sorkar apiangin an manganpui thil a ni a. Congress an sorkar hma daihin MNF-in Airport hi AAI hnenah hlan tumin hma a lo la daih tawh a. Chu hmalakna chu Congress sorkar khan a chhunzawm tih a sawi.
Chief minister chuan airport enkawlna atan hian hloh pawh an inhuam a. Mahse, chu chauh sum hmanna tur a ni lo a, sorkarin sum hmanna tam tak a nei a. Rualawt ngawih ngawiha thalai awmte duhkhawp tur hian sorkar sum hian a har dawn a, a chho kal deuh hlek a ni an ti a. Chu chu sorkar hmasate ngaihdan tho a nih avangin kawng dang an dap tho tih a sawi.
Lalduhoma chuan AAI chuan airport ram chu a thlawna neih an duh bakah, a hlawkna zawng zawng tel an duh a. Hei bakah tui, kawlphetha leh security tumsak an la ngai dawn a, cheng khat pawh sen an tum lo va. Mahse, hei erawh an pawm theih loh thu a sawi a. Chutih laiin, IAF erawh a ram hi lease-in an lei ang a, tuna parallel runway siamna te, a awmsa pawh an sum sengin upgrade an tum a. Thil dang siam ngai te chu an sensoin siam vek an tum a. Runway piah chin lamah an inhung ang a, security pawh an intum ang a, runway piah lamah an inhung dawn a. A hlawkna zawng zawng pawh Mizoramin a tel dawn a. Hetiang a nih avangin mipuiin Airforce hmel an hmu dawn lo va, terminal building leh engkim a ngaiin a la awm vek dawn tih sawiin, “AAI leh IAF duhdan chu an inthlau em a, duhthlan dawn ralah thlanawm hleih tak a ni,” a ti.
Chief minister chuan tun dinhmunah duhthlan tur pathum a awm tih sawiin, pakhatnaah chuan sum neiha tu hnenah mah hlan loh a, Mizoram sorkarin enkawl zui zel tih a sawi a. Pahnihnaah chuan AAI dawr that leh tih sawiin, heng thang pahnih a per chuan IAF tho thlan a ngaih tur thu sawiin, “Mizo mipuite tan tha lo tur chu kan pawm dawn lo va, a tha tur erawh chu kan pawm ngam ang. Tute emaw sawisel avang ringawt leh, thil tha kan tih pawh sawisel duhtute sawina ringawt avang hian, thil tha kan tih loh ngam phah dawn lo. Kan ram tan a tha tur chu kan ti ang a. Amaherawhchu, kan ram tan a tha lo a nih chuan kan ti hauh lo vang. Chu chu Mizo mipuite ka tiam duh,” a ti.
Tuirial bialtu MLA K Laldawngliana private resolution put luh, ‘Mizoram sorkarin Lengpui Airport, Indian Airforce kuta hlan/hralh tuma hma a lak mek hi tha ka ti lo va. Titawp rawh se’ tih chu sawiho a nih hnuah, Dy Speaker Lalfamkima kaihhruaina hnuaia buk a nih hnuah, hnawl a ni.