Virat Kohli-a chuan one day international-ah run 14,000 a vuak chhuah rualin century a siam a, ICC Champions Trophy khelh mekah India chu a hmelma hlun, Pakistan lakah wicket rukin a chakpui a, semi-final luh an hnaih rualin an tumpui hian tlak an hnaih ta hle thung.
Pakistan hi thum vawrah chakin vuak hmasak an thlang a, run 241 an tlin a. India-in a vawm lama na taka an beihna chhang let turin an thawk tha lo va, an inringtawk lo deuh bawk.
Saud Shakeel leh Muhammad Rizwan te chu run vaw chhuak tam ber niin run 62 leh 46 an siam a, ball erawh an hmang hnem dun hle a, run 76 leh 77 an hmang.
Khushdil Shah-a’n a tawp lamah ti thain ball 39 a hmachhawnah run 38 a siam a, Pakistan run siam tlem lutuk tur a chhan hram a; mahse, an inkhelhna hmuna vuak hmasaka chakte run siam chawhrual, 258 an phak lo.
India tan spinner Kuldeep Yadav chu vawm tha ber niin mi pathum a vawm hlum a, run 40 a pe a. Hardik Pandya chuan over riat a vawmah mi pahnih vawm hlumin run 31 an vuaksak bawk.
Pakistan hian a vawm lamah tha taka bul tanin yorker hmangin left-arm quick Shaheen Afridi chuan over nganaah India captain Rohit Sharma-a middle stump a vawm phawi zawk.
Mahse, Kohli a lut a, a vawi 51 nan ODI century a vaw chhuak.
Abrar Ahmedchuan leg-break hmangin Shubman Gill chu run 46 a siamah a vawm hlum a; mahse, hei pawh hian India kal a tibuai zo lo.
Shreyas Iyer-a’n run 56 vaw chhuakin Kohli-a hian ball 111 a vuakah four vawi sarih vaw chhuakin ball 45 hmang bangin India a chakpui.
Kohli-a hian century hi a siam hman lo teuh hle a, run hnih chiah an mamawh tawh laiin run 96 a siam mek a, kum 36 mi hian Khushdil-a vawm chu extra cover-ah four a vuak chhuahsak a, a tlin ta hram a ni.
India hi Group A-ah vawi hnih khelhah chak ve vein a chung berah an awm mek a. Pakistan hi chak lo ve ve thungin a mawngah an awm thung.
Thawhtanniah New Zealand-in Bangladesh an hneh chuan India hian Kiwis nen knockout phase an lut thei dawn a, Pakistan an tla ve thung ang.