Aizawl: PHED Minister Prof. Lalnilawma chuan nimin khan Tlawng lui (Reiek kai)-a tui kam khuahna, temporary barrage siam hna thawh mek tlawhin a enfiah.
Aizawl khawpui chawmtu Tlawng chu a kum tela a kam zel avangin kum 2022 atang khan thal intan tak tak hmain tui khuah nan temporary barrage siam kum tin thin a ni a. Barrage hi meter 2.5-a sanga siam thin a ni a, hei hian metre 350 vel tui tling tura beisei a ni.
April 9, 2021 khan Greater Aizawl Water Supply Scheme Phase-I leh Phase-II atanga Aizawl khawpui chawm tura 38 MLD mamawh a nih laiin, 31.461 MLD-ah a tla thla a. Khami hnu atang khan kawng hrang hrangin hmalak a ni a. Temporary barrage siam hian thal khawro tak tak lai, chawlhkar khat vel tla tur tui a khawl thei thin a ni. PHED lamin an tehna atangin erawh kumin 2025 hi Tlawng tui a la tlem ber tura ngaih a ni.
PHED Minister Prof Lalnilawma chuan PHED hotuten lo dawngsawngin hmalakna leh ruahmanna dang awmte an sawi ho a. Tui supply lama hmasawnna tura ruahmanna hrang hrangte ngun taka ngaihtuah chungin chak taka hmalak zel a nih tur thu an sawi.
PHED Minister hi Aizawl West III bialtu MLA V.L. Zaithanzama chuan a tawiawm bawk.