Mizoram Police chuan Lengpui Airport atanga zin chhuaktute chuan thawmhnaw leh thil dang ken turte uluk taka endik hmasa vek turin an ngen.
Nimina an thuchhuahah Mizoram Police chuan tun laiin Lengpui Airport atanga zin chhuak tur zingah phalna nei loa silaimu keng man an awm fo tih sawiin, “Sual vang pawh ni lo, fimkhur loh vanga silaimu emaw lo ak palhte pawh license nei lo kan nih chuan dan (Arms Act) hnuaiah thubuai ziah luh (register) a ngaih phah thin a, hemi avanga thubuai kan neih theihna laka kan him theih nan silai leh a mu (Arms & Ammunition) kawl reng rengin danin a phut angin license kan nei ngei tur a ni,” an ti.
Lengpui Airport atanga zin chhuak tur reng reng mahni in an chhuahsan hmain an bag, thawmhnaw leh thil dang an ken turte uluk taka endik hmasa vek tur leh, mi dang bag emaw, parcel emaw, an kensak dawn a nih pawhin airport thlen hmain uluk takin a chhunga awmte endik hmasa thin turin an ngen.