‘Pang aw inzial inzial’ tihte, ‘Pi buh deng pi buh deng’ tihte leh ‘Tira mei kaiah, chhimtira mei kaiah’ tihte chu tun lai thangthar zawkte zingah a hre lo hi a tam zawk an ni tawh mai thei.
Octave Mizo Choir chuan he’ng pawnto hlate hi music remkhawm tha tak nen, tunlai thangthar zawkte’n an hriat theih nan an rawn phuahkhawm. Pawnto hla te bakah concept fel leh tha tak neiin Zo zia lang tam thei turin music video an buatsaih a. Chu music video chu an tichhuak ta.
Tourism Minister Lalrinpuii chuan, Octave Mizo Choir music video hmasa ber — Pawnto Hla/Pipu Zai — tih chu Hyve Aizawl City Hall-ah a tlangzarh.
He music video hi Rs nuai 2 chuang senga puitlin a ni. Music video hian Mizo zia an rawn pho chhuak a, zaipawl ni mah se, a ruala zai thup thupa lang liam ang mai mai kha an duh lo. Mizo hnamzia lang tam thei tur ang berin – Chhinlung chhuak leh thlang tlak lam te, Sechhun leh naupang pawnto dan te an rawn tar lang. Music video a nih angin, a zawng zawng erawh tar lan sen a ni lo thung.
Music video tlangzarhtu, Toursim Minister Lalrinpuii pawhin Octave Mizo Choir — Pawnto Hla/Pipu Zai — hi ropui a ti. Mizo hla pangngai leh Zo zia inchawih kha ropui a tih thu sawiin, choir member te pawh theihtawpa hmasawn zel tur leh, zaipawl hmanga khawvel huapa Mizo tihmingtha zel turin a chah bawk.
Octave music video tlangzarh hunah hian, Tourism department Director R. Lalrodingi pawhin hmanpuiin, thu a sawi.
He music video hi, a duh apiang tana thlir leh ngaihthlak theih turin YouTube lamah dah chhuah tawh a ni.