Aizawl: District child protection unit, women & child development department, Kolasib district buatsaihin nimin khan Paris hall Kolasib-ah Sensitization programme for Sponsorship & foster care beneficiaries neih a ni.
He hun kaihruaitu David Zaitinvawra, District Child Development Officer chuan Sponsorship & Foster care chungchang sawifiahin, he tanpuina sum hi naupang a bika enkawlna mamawh te hnena tanpuina niin, kum khat chhung atan thlatin Rs 4000 a pek tur niin, tun tumah hian naupang 110 hnenah bank account kaltlangin pek an nih tur thu a sawi a, sorkar sum sanction mil in tun tumah hian April 2024 atanga Sept 2024 thla 6 chhung atan naupang pakhat zelah cheng 24000 pek an nih tur thu a sawi.
He huna khuallian Robert C Lalhmangaiha, DC Kolasib chuan thu sawiin, naupang enkawltu mumal nei lo leh baihvai zawkte enkawla ngaihventute chungah lawmthu sawiin, an sum dawn te chu naupangin zirna tha zawk, hriselna tha zawk leh eitur hrisel zawk an hmuh theihna atana sorkar ruahmanna a nih thu sawiin, an sum dawnte chu tha tak leh tangkai taka a hmanna tur dik taka hmang turin naupang enkawltute chu a fuih a ni.
Hei bakah hian khuallian chuan, hmasawnna avangin khawvelah thil thar leh tha zawk tam tak kan hmachhawna, chumi a nih rualin nu leh pa inthenna avang te, pa ber boral avang leh thildang avanga harsa taka nu in fa an enkawl ngai tam tak kan awm meka, kan insiamthat loh chuan kan la tawk chho zel dawn niin a lang a ti a, chutiang karah chuan sorkar in nakin lawka kan ram rohlu ni tur naupangte enkawlin theihtawp a chhuah a ni a ti bawk.
Fahrah, chanhai leh baihvai an pun zel loh nan, tuna pa ni mek leh la ni mai tur te hian ngaihtuahna sengin, kan in enfiah a pawimawh tih sawiin khuallian chuan, naupang enkawltu nu leh pa tam tak, fate aia sum leh pai rilru a dah lian zawk kan tam ta lutuk hian chhungkaw kehchhiatna a thlen a ni tiin, chhungkaw tha din turin thahnemngai takin hma kan lak a pawimawh tih a sawi bawk.
He tanpuina sum hian enkawltu mumal nei lo naupang te bakah HIV naupang, rualbanlo naupang te leh POCSO victim naupang te a huam a ni.