Aizawl: Finance changtu Chief Minister Lalduhoma chuan Mizoram sum deh chhuah tlem angin lang mah se, statistic dik tak an hman avangin sum leh pai deh chhuah chu a pung reng tih a sawi.
Nimina sorkar kum thar atana Mizoram sorkar sum ruahman a pharh zawhah Assembly Annexe Conference Hall-ah thuthar thehdarhtute kawmin Lalduhoma chuan GSDP a tam chuan pawisa puk theih zat a tam a, pawisa bat zat a lan tlem avangin GSDP hi lan mawi an duh avangin an lo tisang thin em ni tih theih a nih thu a sawi.
Lalduhoma chuan campaign laia an au hla chu Zoram mipui hmaah facts & fugure dik, statistic dik an chhawp ang an tih angin, tunah hian an chhawp ta tih a sawi a. Kum kai lai mek hi a thar an la siam hman loh avangin, GSDP hlui behchhana siam a nih thu sawiin, “Tunah erawh hi chuan, a dik kan hmang tan thei dawn a. Kum kal mek a, BE atang khan RE-ah chuan GDSP a lo tlahniam ta duai a, Rs vbc 1,434.25 in GDSP a hniam a. Heti khawp hian kan tihniam ngam a ni. A chhan chu kan nihna dik tak nia kan hriat avangin,” a ti.
A hmasa nena a inthlauhna chu zaa 29.21 a tling hial tih sawiin Lalduhoma chuan, “Amaherawhchu, kan ramin sum leh pai kan dek chhuah a tlahniam ta tihna a ni lo a, kan sum leh pai deh chhuah hi a pung a, a figure a dik ta mai a ni zawk a. Hei hi Zoram tan thil thar a ni. Budget thar turah chuan GSDP hi Rs vbc 2,085.55-in a pung ta dawn tho a. A punna hi zaa 6.13 a ni chho leh dawn a ni,” tiin, vawi khat tihdik tawh chuan a dik chho tawh mai dawn tih a sawi.
Lalduhoma chuan growth rate pawh a tlahniam chuang lo a, kum kal meka growth rate zaa 10.05 ai hian kum thara budget hi zaa 10.21-in a pung chho leh dawn niin a sawi.
GSDP dik an hman tan avang hian nghawng a nei ta tih sawiin Lalduhoma chuan, “Fiscal deficit a nghawng a, kumina fiscal defict (BE)-ah chuan -2.84 chauh a ni a. Fiscal defict kan nei tlem a, danin a phut zaa 3 hnuaiah kan awm a. A lan danah chuan a that hmel khawp a. Mahse, GSDP atanga teh a nih avangin, GDSP dik kan hmang a, a lo tlem tak avangin kan Fiscal deficit kha a lang sang ta luah a, -7.63 ah a chho ta dawrh a. Mahse, tehna dik a nih si chuan, kan nihna diktak kan pawm a, mipui hmaa kan pawm ngam a ngai kan ti tho a ni,” a ti a. Kum lo awm turah fiscal deficit tur chu -4.57 ah a tlahniam dawn a, hemi hnuah a tlahniam chho leh hret hret dawn niin a sawi.
Leibat zat pawh a nghawng tih sawiin Lalduhoma chuan, “Kum kal meka leibat hi GSDP atanga tehin zaa 29.22 a ni. A dik kan hmang a, leibat zat a percent a lo pung a. A lan dan reng chuan ZPM sorkarah chuan leibat a pung ta thur a ni maw, tih tur a ni. Mahse, a tak taka kan leibat zat, a sum chuan Rs vbc 1,003.94-in kan leibat hi kan tihniam zawk, kan chuang khawp mai. Leibat avanga harsatna an tawh thu kan hruaituten an au pui a, kum khat chhunga leibat kan tihniam thei hi lawmawm kan ti a. A figure-ah lang sang mah se, a taka kan performance hi a ropui,” a ti bawk.