Zan curfew hlih a ni; zan lam nun fimkhur erawh a ngai
Mizoram sorkar chuan hun kum hnih dawn zan curfew a puan hnuin inrinni zan atang khan phelh a nih tak thu a puang a, zan lam boruak pawh a zalen chho leh ngeiin a rinawm bawk.
Tam tak chuan zan curfew puan a nih duh loh hian campaign hrang hrang an lo nei tawh thin a, sorkar lamin a phelh duh miau loh avangin hun rei fe chhung chu kan la hmang lui ngar ngar a, a lehlam zawng tak chuan sualna hrang hrang pawh a reh deuh nite pawhin a hriat.
Mahse, hre zawkte sawidan leh zeldin dan atang chuan hetia zan lam curfew phelh a nih lawk lohna chhan hi mi hausa leh neinung deuhten an fate zan chhuak tur an khap hneh loh khapsakna tha tak a nih avangin a order chhuahtu lam hian an la puan chhunzawm char char niin sawi a ni bawk a. Hei erawh tlangkam titi mai mai a nih han ring ringawt phawt ila!
SOP hrang hrang chhuah a nih hnu leh inkhuahkhirhna hrang hrang phelh thawl a nih hnu pawhin zan curfew hi hlih a ni ve ngai lo a, tuna hlih a lo nih tak hnu hian mipui lam pawhin zan hun hlimawm leh nuam zawk kan neih theih ngei nan awm dan tawk thiam ila, hri leng a la reh lo tih hrechungin kan kan fimkhur thar zual a la ngei reng tih i hre bawk teh ang u.
Misual inlarna hun tha a inher leh dawn tih hriain, mitinin zan lamah kan bungraw neihte fimkhur zawka dah that i ching leh bawk ang u hmiang!