Aizawl: BJP Mizoram President Vanlalhmuaka chuan Prime Minister Narendra Modi-a’n hmeichhiate a ngaih pawimawh avangin PM scheme hman mek zingah hmeichhiate hminga dil ngai a awm tih a sawi a. PM scheme kaltlanga hamthatna tam tak dawn tur a tam laia dawng loa an la awm thin chu state sorkar mawh a nih thu a sawi.
Inrinni khan BJP Mizoram Mahil Morcha chuan an pisa, Mipui Runah International Women’s Day pualin hun an hmang a. He hunah BJP Mizoram president chuan thu sawiin hmeichhiate dinhmun hniam zawka awmte chawi kan hi PM Modi tum a nih thu a sawi a. India ram president te, finance minister-te chu hmeichhia niin, anni lo pawh union minister-ah hmeichhia a dah nual bakah rorelna sangah pawh hmeichhiate tan seat a hauhsak bawk a. Hei hian PM-in hmeichhe dinhmun sawisan a ngaih pawimawhzia a lang chiang hle tih a sawi.
Vanlalhmuaka chuan PM Modi kaihhruai sorkar chuan PM scheme tam tak hman mek zingah hmeichhiate a ngaih pawimawh avangin hmeichhe hming dil ngai a awm a, a thlawna gas connection ringawtah pawh Mizoramah hmeichhe hmingin mi 36,000 hnenah pek an ni tawh tih a sawiin, PM Scheme kaltlanga hamthatna dawngtute a lawmpui tih a sawi.
BJP chuan party politics a khelh loh avangin PM scheme dawng thei turten an chanvo an chan theih chu an duh ber a. Hetih rual hian PM scheme hrang hrang kaltlanga hamthatna tam tak dawn tur a tam em em laia, dawng lo an la awm thin chu state sorkar mawh a nih thu a sawi bawk.
BJP State Mahila Morcha President C. Lalbiakkimi kaihhruai inkhawmah hian BJP State Core Group Member Lalrinliana Sailo pawhin thu a sawi.