AZL: March 7, 2025 atanga Thenzawla Lothazawl field-a Presbyterian Kohhran Hmeichhe Inkhawmpui Lian vawi 51-na neih chu nizan khan a tiak.
Presbyterian Kohhran Hmeichhe Inkhawmpui Lian, vawi 51-naah hian thupuiah ‘Rinawmna’ (Sam 37:3) hman niin speaker atan Upa Lalnunpuia Hrahsel hman a ni.
Presbyterian Kohhran Hmeichhe inkhawmpui hi March 7 khan palai lawmna leh report inkhawm neih a ni a. A tuk, Inrinni nilengin Thenzawl field veng Presbyterian kohhan biak inah rorel inkhawm neih a ni a, rorel hlan hian pandal-ah inkhawm neih niin, zanah vantlang pathian biak inkhawmah Synod Moderator Rev R.C. Lalnghakliana’n pathian thuchah a sawi.
March 9, 2025 (Pathianni) chawhma leh chawhnu inkhawmah Inkhawmpui lian speaker-in thupui a sawi a, chawhma inkhawmah hian Kristian Chhungkaw dinhmun tehna ‘No Mawi’ hlan a ni bawk.
Zanah Inkhawmpui Lian Chairman Zothanpari’n Pathian thuchah a sawi thung.