Aizawl: Aizawl: Sports Minister Lalnghinglova Hmar chuan Mizoramin Olympic 2036 hmathlir nei chungin sports-a hmasawnna leh skill development kaihkawp a tum tih a sawi.
Zirtawpni leh Inrinni khan Ministry of Youth Affairs and Sports (YAS) buatsaihin Hyderabad-ah state hrang hranga sports minister inkhawmpui, ‘Chintan Shivir of Ministers of Youth Affairs and Sports of States/UTs’ neih a ni a. He inkhawmpuiah hian Sports Minister Lalnghinglova Hmar hi session pahnih “Talent Search and Nurturing of Grass-root Talent’ leh ‘Welfare of Sportspersons & Coaches and Sports Recruitment Policy’-ah te co-chair a ni.
Lalnghinglova Hmar chuan India-in Olympic 2036 thlen a tumna kawngah tun atangin India infiammite thatna leh thiam zawng chhut a, Olympic medal la tam thei tur zawnga inher rem a tul tih a sawi a. Sports thiamna chu skill pawimawh tak a nih thu sawiin, Mizoram chuan Olympic 2036 hmathlir nei chungin sports-a hmasawnna leh skill development kaihkawp a tum thu a sawi.
Sports minister chuan Mizoramah local cable TV-te nen tangkawpin football, basketball leh volleyball-ah state league mumal tak an kalpui a, mihring nuai 11 chauh ni chungin Indian national football team hnuhnung berah Mizo player pali an tel thei a. Sports hmasawn nan media nena thawhhona tha neih a pawimawh tawlh tawlh dawn niin a sawi a. Central sorkarin ‘One Corporate sector – One sport discipline’ kalpui a tum chu lawmawm a tih thu a sawi a; chutihrualin, Mizoram ang state tê leh industry lian awm lohnate pawhin an hlawkpui lehzual turin ‘One Corporate sector – One state’ anga her rem a rawt.
Conference-ah hian India rama state 28 leh union territory pariat atangin minister leh official thahnem tak an tel a. Anni bakah Ministry of Youth Affairs and Sports, Sports Authority of India leh National Sports Federation hruaitute leh sports expert thahnem tak an tel bawk.