Assembly rorel thutkhawm neih mek zel a ni a, bill ngaihnawm tak tak awmin, sawizuina ngaihthlak nuam fe fe a awm chho ta zut bawk.
Hetih lai hian house leader leh chief minister ni bawk tawngkam erawh dawnsawn nuam lo leh mipuite hriat atana mawi lo a ni emaw, rorelna in sang timawi lo thei zawnga chetna a awm leh zeuh zeuh thin hi inenfiah a ngai khawpin a lang.
Kar hmasa lawkah Chapchar Kut ropui taka hmangin, hemi tuma Kut Pa, tuna kan house leader nimek hian mizo nun ze mawi hrang hrang sawichhuakin, thangthar zawkte fuihna thu tha tak tak leh entawn tur tam tak a sawi a, ngaithlatute kutbeng thawm em pawh a reh hmain rorelna in sang lamah erawh a tawngkam a no lo leh lek lek thin lai hi a ngaimawhawm lek lek thin.
Roreltute hi Pathian min pek, kan aiawha thute an ni a, constituency tina miten kan mi duh tak kan thlanchhuah vek an ni hlawm. Inzahtawn a, rorelna in sang tizahawm chunga tawngkam mawi hmang tura kan beisei an ni hlawm bawk. Chutiang a nih laia kan ram hotu lu berin tawngkam a thlahdah lek lek thin nia lang ta zeuh zeuh hi chu a fuh lo thin khawp mai.