Aizawl: Excise & Narcotics department Minister Lalnghinglova Hmar chuan Rangvamual, Phunchawng leh Tuikhurhlua zu hlauhawm nia sawite mihring tana a hlauhawmzia chipchiar taka pho lang turin Delhi-ah endiktira hmalak mek a nih thu house a hrilh.
Thawhlehnia Assembly Session-a zawhna leh chhanna huna Champhai South bialtu MLA Lt. Col. Clement Lalhmingthanga zawhna chhangin excise minister chuan zu hlauhawm nia sawite mihring tana a hlauhawmzia chipchiar taka pho lang tura test-na tur laboratory tha Mizoramin a neih loh avangin tunah hian Arbro Pharmaceuticals Pvt. Ltd, Kirti Nagar, Delhi-ah sample hi lak a ni a, zirchian mek a ni a. A result a la chhuak lo va. Engang chiah nge a nih hi scientifically-a endik tha an tih avangin zirchian hna kalpui mek a nih thu a sawi.
Lalnghinglova Hmar chuan January 30, 2025 khan excise leh Mizoram Police-te joint operation neia mi 150 thawk chhuak chuan zu siamna hmun 101 lai tichhiain, rakzu ltr 1,083, zu bilh lai tin 25,556 leh zu bilhna bel lian 96 tihchhiat a nih thu a sawi bawk.
Zawh belhna chhangin excise minister chuan Champhai district chu international boundary a nih avangin ruihhlo lut a tam tih sawiin, tunah phei chuan Saitual district thlengin ruihhlo kalkawng a ni tawh tih a sawi a. Assam Rifles leh excise bakah police-ten khauh takin operation an neih chuan Ngopa lamah an hel veleh thung a. |hal laiin Tiau kaltlang theih a nih bawk avangin kil tinah duty indah theih a nih loh avangin a buaithlak hle tih a sawi.
Minister chuan internatioal boundary hi Assam Rifles ven niin excise nen ruihhlo doa hmalakna kawngah an thawhhona a tha tih sawiin, “An hnawksak lem lo. Heroin leh meth man an neihte pawh excise kutah an hlan deuh zel a. Tun dinhmunah thawhhona a tha a, ruihhlo lut a tam avangin kan inveng seng lo,” tih sawiin, a ven leh a veh hna lo deuh, zirtirna lam pawh department-in an kalpui ve zel niin a sawi bawk.
Nikum June thla khan a senchi lane tia sawi thin, Vaivakawn, Zohnuai pheia zu zawrh titawp turin excise department-in Vaivakawn khawtlang thawhpuiin nasa takin hma an lak hnuah a ziaawm tawh hle tih sawiin, “A senchi lane tih pawh, department hnathawh leh hmalakna a nih rualin, Vaivakawn khawtlangin an thawh hlawk hle a ni,” a ti.
Excise minister chuan tun dinhmunah veng duak angin lang mah se Rangvamual leh Phunchawng chhehvelah, hmun hla zawka lui mawng lamahte zu sakna hmunpui a la awm reng tih sawiin, “Hengte hi han bei a, han ti tak tak tur hian eng emaw chen chu kan tirem thei mai ang. Mahse, a aia hla zawk an kal a, hmun dang atangin zu chhe zawk an sa a, in lo thei lo Mizo thalaiten kan thihpui bawk si avangin engtianga khauh tur nge, engtin chiah nge kan tih ang tih hi ngun taka ngaihtuah a ngai ve bawk a ni,” a ti bawk.