Union Home Minister Amit Shah hriatpuina hnuaiah Mizoram sorkar leh Assam Rifle te chuan Lammual leh a chhehvela AR ho hmunhma chu Zokhawsang a sawnchhuah a nih thu leh ziaka inhlanna an nei ta a, a lawmawm hle.
Sorkar hrang hrang kaltate khan Lammual leh a chhehvela AR ho sawnchhuah dan tur hi lo ngaihtuahin, theihtawpin hma an lo la tawh thin a, ZPM sorkar in a taka hlawhtlinna an rawn hlenchhuak thei ta hi hriatreng tawh tur leh chhinchhiah reng tlak a ni bawk.
Assam Rifle te hian tun hma lam atang tawhin Mizo mipuite min tihbuai hi an lo nei nasa tawh hrim hrim a, khawpui chhungah lah nise hmunhma tha thaah inkulhin, an vawk lal len viau thin bawk. An lo chet tawhna leh tal vel dan zawng zawng chu sawichhuah kher a chi chuang loh a, hmun lai li an chhuahsan tur erawh hi chu thu lawmawm, beng thleng thlenga bawp khaina tham a va ni em.
Hetiang a nih rual hian sorkar lam pawh hian khauh zawkin an hmunhma chhuahsan hi enkawl zui se la, mimal kuta inchi khat pawh a awm lohna tura hma an lak a tul hle. Vantlang hmun pawimawh tak tak atan hman leh siam theih ni se la, mimal kuta khawii emaw lai a lo awm zeuh a nih vaih chuan chawimawia an awmna zawng zawng phehthlaka awmin, sawichhiat leh diriam zui an hlawh ngei ang.