Aizawl: ZPM party chuan Chief Minister Lalduhoma hmalaknaa Assam Rifles-te Zokhawsanga an insawn chhuahna tur hun hman a ni ta chu ram tan mellung pawimawh tak leh hun chhinchhiahtlak tak a nih thu an sawi.
Inrinnia thuchhuah an siamah ZPM chuan Inrinnia 23 Sector Assam Rifles-ah Assam Rifles-te Zokhawsanga an insawn chhuahna tur hun hman a ni ta hi lawmawm an tih thu an sawi a. ZPM-in rei lo te sorkarna an chan hnua hetiang thil ropui an tawng chu anmahni hruaitu Pathian hnenah lawmthu an sawi.
ZPM chuan Assam Rifles-te Zokhawsanga an insawn chhuahna tura chief minister Lalduhoma hmalaknaah leh Assam Rifles hotute chungah lawmthu sawiin, he hun hmang tura Delhi atanga lokal Union Home Minister Amit Shah leh a thuihruaite chungahte leh chief minister hmalakna phena rilru ngaihtuahna, tha leh zung sengtu zawng zawng chungah lawmthu an sawi.
ZPM chuan he thil hi Mizoram tan mellung pawimawh tak leh hun chhinchhiah tlak tak a nih angin, Zoram mipuite pawhin Pathian hnena lawmthu sawina chang an hriat a tul tih sawiin, “He hmun hi kan ram tan, mipuite tan hmun tangkai tak a nih theih nana ngaihtuahna seng chhunzawm zel turin sorkar chungah beiseina leh rinna kan nghat tlat a ni,” an ti.