Union Home Minister Amit Shah chuan Zokhawsanga Assam Rifles sawn chu Mizoram tan bung thar kaina a nih thu a sawi a; Prime Minister Narendra Modi kaihhruai BJP sorkar chuan hmarchhak bial tihhmasawn chu an ngaih pawimawh thu a sawi.
Inrinni chawhnu khan Union Home Minister Shah hriatpuina hnuaiah Aizawl khawpui lailia Assam Rifles battalion ram Mizoram sorkar kuta inhlanna leh map inthleng tawnna chu 23rd Sector Assam Rifles, Khatlaah neih a ni.
Ram inhlanna hun buatsaihah hian Assam Rifles Director General Lt. Gen Vikas Lakhera chuan Vanlaldina Fanai, Commissioner, GAD, Mizoram hnenah Zokhawsanga an awmna tur hmun map a hlan a. Vanlaldina Fanai pawhin Zokhawsanga Assam Rifles awmna hmun thar map chu Lt. Gen Lakhera hnenah a hlan ve thung.
He hunah thu sawiin Union Home Minister Shah chuan Prime Minister Modi kaihhruai sorkar laipui chuan hmarchhak bial tihhmasawnna a ngaih pawimawh thu a sawi a. Kum 10 kalta atang khan hmarchhak bial mipuiin ram chhung hmun dangte nen inzawmna thuk tak neiin, hmasawnna kawng an zawh theih nan nasa takin hma an la tih a sawi a. Tourism, technology, sports, entreprenuer, agriculture leh thil dang dangah hmakchhak bialin theihna a neihte chu tipuitling turin theihtawp an chhuah tih a sawi.
Shah chuan BJP kaihhruai sorkar a pian hma, kum 2014 atanga India-in zalenna a neih thleng khan India prime minister ten hmarchhak state hi tum 21 chauh an tlawh a. PM Modi chuan tum 78 zet a tlawh tawh a. BJP an sorkar hmaa union minister hrang hrangin tum 71 an tlawh laiin, kum 10 kalta chhung khan BJP kaihhruai sorkara union minister-ten tum 700 chuang an tlawh tawh tih a sawi.
Union home minister chuan, “Aizawl khawpui laili-a Assam Rifles luah ram hian Aizawl khawpui than zelna tur kawng tam takin a dal a, AR insawn tur hian bung thar a kai dawn a, hmasawnna chhinchhiah tlak tak a ni,” tiin, he hmalakna hi Assam Rifle camp sawnna a nih satliah loh thu leh Aizawl duhawm zawk a awm theih nana hmalakna a nih thu a sawi a. India sorkar aiawhin Mizo mipuiin hma an sawn a, Mizoramah remna leh muanna a awm zel theihnan BJP kaihhruai sorkar a intiam tih a sawi.
Union Home Minister Shah hian Inrinni khan Lengpui-ah tumin, Tourism Minister Lalrinpui hovin an lo hmuak a. Lengpui atangin helicopter hmangin Thuampui Helipad a pan a. Hetah hian Chief Minister Lalduhoma hovin sorkar official-ten an lo dawngsawng a ni.
Inrinni zan khan Union Home Minister Shah hi a thlenna, larsap chenna Raj Bhavan-ah tlawmngai pawl hrang hrang bakah zirlai pawl hruaituten an kawm a. Aizawla zan khat a riah hnuin nimin chawhma dar 11 pelhah khan Lengpui tumhmun atangin Guwahati a pan leh a ni.