Manipur BJP Rajya Sabha MP Leishemba Sanajaoba chuan an state chu sorkar laipuiin pui zel turin a ngen a, buaina avangin mi 60,000 dawnin in leh lo an nei lo tih a sawi.
Eptu MP-ten Manipur-a chi leh chi inkara buai chhuak leh engvangin nge tun thlenga prime minister-in a la tlawh loh tih thua zawhna an neih laiin Sanajaoba chuan an state-ah hian dan leh thupek kenkawhin hma a sawn leh tawh a, hmun thenkhatah lian tham lo thil tenau deuh chauh a thleng tawh tih a sawi.
Sanajaoba hi Manipur Budget 2025-26, The Appropriation Bill, 2025 leh Appropriation (No. 2) Bill, 2025 sawihonaa ding niin chenna in nei lo mi 7,000 vel chu an haw leh tawh tih a sawi.
“Tunah hian inhliam, silai ri leh lungawi lohna lantir a tlem tawh a. Sorkar laipuiin tharum thawhna avanga baihvaite tan kawng hrang hrangin thil a kalpui a. Mi 60,000 chuang relief camp-ah an la awm a. Mi 7,000 chuang erawh an haw leh tawh a. Relief camp tan hian MHA chuan Rs vaibelchhe 400 chuang a pe a ni,” a ti.
Sanajaoba-a hian sorkar laipui chu ramri hung ngai pawimawh turin a ngen bawk.
“Tlanchhiate hi thla 22 chhung in nei lovin an awm tawh a. An nun hi engmah lo atangin an tan leh dawn a. Sorkar laipuiin a puih an la ngai tak zet a ni,” a ti.
Sawihonaah hian Congress MP Shaktisinh Gohil-a chuan budget-a Rs. vaibelchhe 2,866 chu venhimna bik atana hman tur tih chu budget atang ni lo, a dang atangin pek tur a ni tiin a sawi.
Gohil-a hian prime minister chu Manipur tlawh turin a ngen bawk a. “Leader of Opposition Rahul Gandhi pawhin a tlawh a. Prime minister pawh tlawh turin ka phut a. Prime minister hi Gujarat a ni a. Pu Gandhi-a pawh Gujarat tho a ni a. Relah chuangin a mamawhtute a hmu a, Gandhi-a tih dan hi la ve rawh se,” a ti.
Trinamool Congress (TMC) Sushmita Dev chuan Manipur-a internet tihthih avangin sum hloh a tam niin a sawi a. Kum liam taah ram pumah ni 212, darkar 7,812 chhung tihthih a nih thu leh heng zinga darkar 5,088 chu Manipur a nih thu a sawi.