Aizawl: MNF Core Committee member Tawnluia chuan Zokhawsanga Assam Rifles insawn theih nan MNF president hlui pahnih, Laldenga leh Zoramthanga ten zaa 90 an tifel niin a sawi.
Thawhtanni zana Melriat MNF Unit-in Melriat VC inthlana an chak lawmna hun BNRGSK Hall-ah an hman hmanpuitu Tawnluia chuan, AR insawn theih nan MNF founder president Laldenga’n theihtawp a chhuah a, an insawnna tur Zokhawsang ram a tifel a. MNF president, chief minister hlui ni bawk, Zoramthanga’n an camp tur zawng zawng a sain an tui lakna te, electric te, an mamawh kawngpui bakah cheng vaibelchhe tam tak man thil hrang hrang a tifel vek niin a sawi.
Dy CM hlui Tawnluia chuan kum 2019 khan AR an insawnna tur thu home ministry-in an tifel tawh a, kum 2020-ah insawn tur an tifel nawn leh a. An chhuahsan ram pawh mipui tan tiin MNF sorkar khan assembly-ah dan an siam vek tawh bawk tih sawiin, “AR insawnna tura hnathawh tura zaa 90 vel Pu Denga leh Pu Rama’n an tifel vek. ZPM hian kan hotute thawh fel sa a hmawr an rawn bawk mai a ni. An mahniin kum 1 chhung leka an thawh anga sawi hi a dik lo. ZPM hian Zokhawsangah sawn bawngtuthlawh cheh khat pawh an chek lo,” a ti.