Aizawl: Aizawl District Congress Committee (ADCC) chuan Food, Civil Supplies & Consumer Affairs (FCS&CA) in ration buhfai supply tur thlan danah thil felhlel awm nia an hriat avangin chhui chiang turin ngenna lehkha nimin khan Mizoram Lokayukta Chairperson Lalmalsawma hnenah an theh lut.
ADCC chuan an lehkhaah hian FCS&CA-in March 7, 2024 khan buhfai (Grade A rice) supply tur Limited Tender Notice a chhuahnaah a chhang hniam ber ni lo thlan a ni a. Sorkarin tender a chhuahnaah a chhang hniam ber, K. Zabuanga (RL Store, Ngaizel, Kulikawn) chhanna, Rs. 3,400.50 per quintal aiin LZ Juice, Melthum chhanna Rs. 149.50 per quintal-a sang zawk chu thlan a ni a. LZ Juice (Rs. 3,550/Quintal)-a chhangtute hnenah pek a nih hian quintal khatah mipui sum (public exchequer) Rs. 149.50 zel sorkarin a hloh niin an tar lang.
A chhang hniam ber ni lo supplier ni tura thlan a nih avang hian induhsakna uchuak tak a awm ngei niin a lang thu leh sorkarin sum tam tak a hlohnaah hian hlawkna uchuak tak teltu leh, eirukna (corruption) thuk tak a inzeh ngei an rin thute, buhfai supply tur thlannaah hian supply minister mawhphurhna a awm em tihte, council of ministers thutlukna a nih chuan an hotute mawhphurhna a awm em tih leh hlawkna an tel ve em tih chhuihchhuahsak turin Lokayukta-ah an thlen a ni.