Aizawl: Reserve Bank of India (RBI) Treasury Holdings-a Mizoram sum leh pai dinhmun Thawhlehni thlenga chinchhiah danin Rs vbc 1,379.35 a nih thu finance changtu, Chief Minister Lalduhoma’n house a hrilh a; tun dinhmunah sum neih en chuan a thlamuanthlak tih a sawi.
Thawhlehnia Assembly Session-a zawhna leh chhanna hunah Lawngtlai West bialtu MLA C Ngunlianchunga zawhna chhangin Lalduhoma chuan, February 15, 2025-a chhinchhiah danin Mizoram sum leh pai dinhmun chu Rs vbc 895.08 a ni a, Thawhlehnia chhinchhiah danah erawh Rs vbc 1,379.35 a nih thu a sawi a. Sum dinhmun hi ni tin zanah vawiin dinhmun an hriat thin thu a sawi.
Chief minister chuan tuna Mizoram sum neihte en hian thlamuanthlak angin lang mah se, sorkar department hrang hranga pek chhuah leh tur a nih thu sawiin, chung zingah SASCI pawh a tel tih a sawi.
Kumin January hnu lamah sorkarin way & means lak a nei lo tih sawiin Lalduhoma chuan, “Leiba anga ngaih tur a ni lo va. Vawiina kan lak hi a tukah kan rul leh zel a. Lak zawng zawng belhkhawm chuan pum tam angin a lang; mahse, kan rul leh zel tih hi sorkar kal dan a ni,” a ti.
Opening-ah negative balance a awm tih pawh, negative balance nei loa awm kum a awm a rin loh thu a sawi a. Sorkar chu leiba inrochun zel a nih avangin negative balance neih loh theih loh a nih thu a sawi bawk.