Aizawl: Nilaini zan zanlai (Ningani zing) dar 12:35 vel khan Lawngtlai district-a Diltlang ‘S’-ah in pasarih, chhungkaw 17 luah lai chu bungrua engmah chuh hman lovin a kang ral.
Kangmei chhuakah hian dawra luah lai pali a kang tel a. Heng bakah hian in rel lai, RCC hnuaia bungrua leh thingzai pawh a kang vek a, dawr pakhat chu thiah a ni a. Bike pakhat a kang chhia a, vawk pakhat a kang hlum bawk.
Kangmei a chhuak tih khawtlangin an hriat veleh mi tlawmngaiten an thleh nghal a, thi leh hliam an awm hriat a ni lo.
Central YLA chuan kangmei tuartu chhungkua te an tawrhpui thu leh a tul anga hmalak zel an tum thu an sawi.
Kangmei tuar chhungkuate hi Lalchhuana, A.Thansangi, H.Lalmuanpuia, Denis Lalremruata, Zarbawihi, Benota, Elizabeth, Rualthankhumi, K. Lalbiakzama, Lalrawngbawla leh Laltlanzuala te an ni a. Laltlanzuala hi RCC in rel lai neitu a ni.
Nilaini khan Deputy Commissioner, Lawngtlai thupekin Collin Hlychho, BDO, Lawngtlai leh Zonal Officer on Dissaster Management-in an tlawh a. DC Office chuan CYLA kaltlangin silpaulin 10 hlan a, BDO Office, Bungtlang ‘S’-in silpaulin paruk an hlan bawk.
DC chuan kangmei tuartute hnenah hian tanpuina pek a nih tur thu an tar lang bawk.