Mihring kan pung telh telh a, boral pawh an awm nitin bawk. Nunna chelh tumin mi tam tak kan hmanhlel a, heng atana pawimawh tak mai pakhat chu thisen pek hi a ni.
Kan ramah pawh thisen pek kan intihhmuh chho zel a, mamawhtute an tam telh telh a, thisen dahkhawl erawh a beitham viau chang a awm thin. Thisen pek hi mi hrisel tan chuan a hlauhawm loh a, nunna tam tak chhan nan a tha hle zawk a ni.
Tangkaina nei miah lo a i inngaih chuan thisen pe la, mi tam tak nunna i chhan a ni mai. Chu baka i tangkaina dang chu a awm dawn chuang em ni le? Thisen pe tura inzirtira, infuih thar sauh sauh hi i ching ang u.
Thisen pek kawnga kan ramin pawl pawimawh tak mai kan neih Association for Voluntary Blood Donation (AVBD) chuan tlawmngaia thisen pek a tulzia tlangaupuiin, mi tam takin an lo zawm tawh a, heng mite hi hrerengin thisen pe tha hnenah lawmpuina pawh an hlan let leh thlap thin. An kalphung hi fakawm tak a ni.
Kan rama damdawi in lian leh lun tak takte hian thisen dawnkhawlsa neih loh chang an nei ta fo mai a, mamawhtu an tam thin si. Tlawmngaia thisen pek hi uar thar ila, pawl leh mimal pawhin thisen pe turin ruahmanna nasa zawk i siam sauh sauh teh ang u.