Real Madrid midfielder hlui James Rodriguez chuan a vanglaiin Zinedine Zidane, Toni Kroos, Luka Modric leh Xavi te aiin a tha zawk tih thu a sawi.
Brazil rama 2014 FIFA World Cup atang khan James Rodriguez chu a lar chhuak tan a, kha inelnaah khan Colombia tan goal 8 ah a inhnamhnawih a, amahin goal 6 a thun bakah mi goal thun tur vawi 2 a siamsak a, kha vang khan miin an hriat chhoh phah a ni.
World Cup match a khelh apianga goal a thun zel avangin 1970 World Cup a Brazilian player Jairzinho hnua hetiang ti leh thei hmasa ber a ni a. Colombia chu quarter final-ah Brazil in hneh mah se James chuan Golden Boot a dawng ta tho a, Golden Ball dawng turin Lionel Messi a pha ta lo thung.
A chet that em avangin Real Madrid chuan la lut turin hma an la nghal a, Ligue 1 club Monaco atangin Spanish club lian hian £63 million in an lei zui a ni.
James Rodriguez chuan Los Blancos tan game 125 a khel a, hengah hian vawi 94 chu bul a tan a. A inkhelh zawng zawngah hian goal 37 a thun bakah mi goal thun tur vawi 42 chu a siamsak hman a.
Spanish club lian hi trophy lian 9 a lakpui hman a, heng zingah hian 2015-16 leh 2016-17 Champions League trophy te pawh a tel a. A hnuah Bayern Munich chu loan in a zawm a ni.
2020 ah khan James chuan Real Madrid a chhuahsan a, Everton, Olympiacos leh Rayo Vallecano ah te a khel kual a, tunah chuan Mexico ramah khelin Leon player a ni mek a ni.
Rodriguez chuan, “Zidane kha player tha tak a ni a, World Cup trophy pawh a la thei a. Amaherawhchu, ka vanglai khan ka tha bawk a, min tluk ka ti thei lo. Chutiang bawkin ka vanglai na na na kha chuan Modric, Kroos leh Xavi te pawhin min tluk lo,” a ti.