March thlaa ram leh ram inkhel a zo ta a, tun kar tawpah chuan club inkhel a awm leh dawn ta.
League lian leh sangte thlir kân England-a Championship atanga kai sang thei tur inchuhna, play-off lam thlir teh ang.
Play-off khel thei tura hmun ruak pali awm inchuhnaah hian Leeds United chu an chiang tawh a. Sheffield United nge Burnley-in zui dawn a la hriat loh va, Sunderland pawh tel thei dinhmunah an ding a, point 12 laia West Bromwich Albion leh Bristol City lakah an fal tawh.
Play-off hi pathumna leh parukna inkar khelh theih a ni a, Opta chuan Black Cats hi pasarihnaa tla leh thei lo tlukah ngaiin an tlak leh theihna chance chu 0.1% chauh niin a dah hial tawh.
Pakhat chiang tawh leh pathum dang dinhmun thaa an awm mek laiin hmun ruak dang pakhat chu team kua laiin an la chang thei a, hei hi a ngaihnawm mek.
An zingah Bristol City chu khelh hmabak ka nei huphurhawm bera ngaih theih an ni a, Burnley leh Leeds khelmualah an la zin a ngai dawn.
Coventry City-in point 59 nei tawhin November thlaa Frank Lampard-a an lak luh khan play-off khelh hi a theih loh thu sawi lo mah se a ngaih pawimawh hmasak chu tlakhniam loh a nih thu a sawi.
An khelh hnuhnung 12-a vawi 10 chak zawnin tunah chuan Coventry hi a sang paruka an tel mai theihna kawng a inhawng.
West Bromwich Albion-in point 57 an nei tawh a. Baggies hi tun season-ah hian a sang zual dinhmun chelh mekte lakah an che tha hle a, an chunga awm pangate an hneh vek.
An hmabakah hian Sunderland, Coventry, Bristol City leh Norwich te pawh an la awm a, an elpui mek laka point an hlawh chhuah theih chuan an tan hlep a tha dawn hle.
Middlesbrough-in point 54 an nei tawh a. Michael Carrick-a an lak luh hnuah hma an sawn nasa hle a. An hmabakah hian central defender an neih a pawimawh dawn a, an khelh hnuhnung pahnihah a pangngai nei lova pawt chawpin an khel.
Finn Azaz, Tommy Conway leh Delano Burgzorg te goal hmaa an hriam zui zel chuan an dinhmun a tha thei bawk.
Point 52 nei tawh, Blackburn Rovers chu an hmabak khelh tur la awma huphurhawm lo ber niin a ngai thei a. An hmabak khelh riatah en mai chuan team hlauhawm an awm lo.
Watford pawhin point 52 nei tawhin ram leh ram inkhelh zawh ruala an mamawh chu an player-te hliam lo kir a ni a, play-off-a inlan theihna remchang tak an nei mek.