- K. Hmingthankaia
Assam Riffle sawnna tur Zokhawsang ram assessment siamtu hmasa ber pawlah khan ka tel ve a. Chung hun lai chuan a ram a khawro-in tui a vang em em a, a lum bawk si, hreawm kan ti thei hle. Sunhlu a tam hle bawk. Sunhlu leh Bawngpuparte kha, Zema daia ‘Atuitling Bar’ atang khan kan ti Serthlum vel ta mai mai khan ka hria. Mahse, componsation pawisa a lo chhuah tak tak kha chuan Kolasibah ka awm leh daih tawh. Componsation claim-tu leh a siamtu( assessment titu) zingah hlawkpui fe fe, mahse, chhiatpuitu engemawzat an awm. Kei chuan chengkhat pawh ka hlawkpui lo. Kolsib lamah Serlui ‘B’ Hydel project khuah turin a chimchhiat tur Builum khawho sawnchhuahna tur, Kolasib Rengtekawn Bawktlang kan buaipui leh daih. Zokhawsang ram nen a awmdan inang ka ti hle.
Aizawl atanga AR sawnchhuah hi kei chuan a tirte atangin ka phurpui ve lo. Vawiin thleng hian kan tan a tha ber angem? tiin ka la hlauthawng ru reng. A ram hi kan sawp chhe vek anga, induhamsiak leh mahni hmasialsiak nan kan hmang anga, inchirhtheh leh insawichhiat tawn nan, inpuh tawn leh inhnial luih luih nan, intihbuaina hmunpuiah kan la chantir mai ang tih ka hlau a ni. AR awm lai hi kan la ngai vawng vawng mai thei a ni.
Chumi hma, tute mahin a ram chhunga kut an thlak hma hauh pawh hian, mi awmtha duhloten Paradise-ah an hmang nghal dawnin ka ring tlat. Sawrkar hian a veng seng lo ang. NGO tan lah chhun zan zawma kiltin ven sen a ni dawn lo. A ualau lai chu a ziawm deuh mahna, chhuahchhawng, Bethlehem leh Tuithiang lam pangper thla zawng zawngte hi a rem lutuk. Family lane leh building thenkhat an ruak anga, sualna chitin tan hmun remchang tha lutuk kan hawnsak a ni mai angem? ka va hlauthawng em.. Theihtawpa AR ho-in an venga an luahlum chung pawhin, hengho hi hmuh tur an awm reng tho a, thihna hial pawh a thleng tawh thin si a. A ram leilung lah, hman atanga vawiin thlenga kher ngat ngattu an awm reng bawk si a. Tunah phei chuan nek nuam an va ti tawh dawn em. Heng zawng zawng hi Sawrkar hian a ngaihtuah lawk em? Khawtlang hruaitute leh NGO lu a va hai nasa dawn em. Police Battalion khat tal Hqr. a kan siam loh pawhin, Company khat tal chuan tun chawpchilh hian an awmchilha, an ven kualchhuah tlaivar reng a ngai nghal ang.
Aizawl tiAizawltu, Aizawl tinuamtu, Aizawl timawitu, Aizawl tizahawma tichhuanawmtu hi kan ti chhe vek anga, kan ti tawp vek anga, induhamsiakna leh inhmasialsiakna hmunpui, insawichhiatna leh innghirnghona hmunpui, sualna tinreng khurpui, Setana lal ram, Setana khawpui, Setana nuam tawlna, Setana Paradise a chang mai ang tih ka va hlau em..
Chutiang thlentir tur chuan, mi chungnung leh thil ti thei ber berte atanga mi chhe hnuaihnung ber leh tawp hnawk ber thleng hian kan inpeih em em hmel tawh bawk si a.
Hawh u, engpawhnise, Assam Riffle ram rauhsan tur pual hian, kan tih theih ropui ber Pathian hnenah venghim turin i tawngtai leh phawt mai ang u.