Youth Icon 2024 Lalsangliana (Taitea) chuan a official music video hmasa ber chu inrinni zan khan tichhuakin, thlirtu nuai chuang fe a nei tawh.
Taitea music video hmasa ber hi ‘Hmangaihna Runthlak’ tih niin, ama phuah a ni a, EME Records-a a thun niin, video hi Dr. Reuben Lalmalsawma siamsak a ni thung. Shooting nan hian Shillong, Meghalaya an hmang a ni.
Youth Icon Top 10 zingah Taitea hi music video siam pariatna niin, a siam hma hian Top 10 zing atangin Zion Tlaichun, J. Lalrosanga (Rsa), Ramengmawia (Mawimawia), Zothankima (Kimkima), Laldinhlua, Samson Lalhunruata leh Lalbiakkima Hnamte ten official music video an lo siam tawh.
Icon star ten music video an tihchhuah leh intihsiakna an neih laia an hla sakte hi tun laia Mizo rimawi khawvela hla lar leh ngaihthlak zin ber an ni hlawm.
Taitea music video hmasa ber hi LPS neitu Lalsawmliana Pachuau in a tlangzarh a ni a, Youth Icon top 10 zing atangin Peter Lalnunpuia, Rsa, Kimkima leh Samsona ten tlangzarhnaah hian telpuiin, judge pathum zing atangin Victor-a a tel bawk.